Moubarak Mohamed Adam Altayeb, Sudaniż ta’ 50 sena ġie kkundannat 14-il sena ħabs wara li ammetta li pprova joqtol lil Hassan Smaila Mohammed li hu Niġerjan.
Il-każ kien seħħ fis-27 ta’ Ottubru tal-2021 fi Triq is-Salib tal-Marsa.
L-imputat kellu jgħaddi ġuri dwar l-attentat ta’ qtil ta’ Hassan Smaila Mohammed, iżda minflok għażel li jammetti. Fost l-oħrajn hu ammetta wkoll li kiser il-paċi pubblika u anke li kien qiegħed iġorr sikkina.
Meta ġie arrestat u mitkellem mill-Puliziija, l-imputat ammetta kemm-il darba li f’moħħu kellu li joqtol lil Hassan Smaila Mohammed.
Il-Prosekuzzjoni qalet li meta l-pulizija staqsewh għal liema raġuni ried joqtlu beda jsir frustrat għax ħass li ma kinux qed jifhmuh.
Minbarra l-14-il sena ħabs l-Imħallef Natasha Galea Sciberras ordnatlu jħallas €2,537 fi spejjeż tal-espeti.