Raġel iddaħħal l-isptar wara li aktar kmieni għall-ħabta tas-2:00 a.m informa lill-Pulizija li kien aggredit f’ħanut tax-xorb fi Triq il-Kbira San Ġuzepp.
Minn stħarriġ illi sar irriżulta li l-każ seħħ bejn Somalu ta’ 54 sena residenti l-Marsa u xi persuni li kienu f’ħanut tax-xorb il-Ħamrun.
Tim mediku ta l-assistenza tiegħu lis-Somalu sakemm seta’ jittieħed l-Isptar Mater Dei għal aktar kura permezz ta’ ambulanza li ssejħet fil-post. Iżjed tard huwa ġie iċċertifikat li weġġa’ gravi.
B’rabta ma’ dan il-każ, il-Pulizija arrestat żewġt irġiel; wieħed ta’ 35 sena minn Birkirkara u l-ieħor ta’ 17-il sena minn San Ġwann.
L-investigazzjonijiet tal-Pulizija b’rabta ma’ dan il-każ għadhom għaddejjin.
