Raġel intbagħat il-ħabs talli ta daqqa ta’ ras lil player fi tmiem il-partita tal-play-off ta’ Nottingham Forest kontra Sheffield United.
Billy Sharp, il-Captain ta’ Sheffield United, weġġa’ wara li t-team tiegħu tilef kontra Forest bil-penalties.
Sharp waqa’ mal-art u ġie ċċertifikat li “ntilef minn sensih”.
Robert Biggs, raġel ta’ 30 sena, waqt li kien il-Qorti tal-Maġistrati ta’ Nottingham wieġeb li hu ħati ta’ attakk li kkaġuna ġrieħi reali u llum weħel sentenza ta’ 24 ġimgħa ħabs.
Biggs, minn Ilkeston, Derbyshire, ġie ordnat iħallas £500 kumpens lil Sharp, u £128 fi spejjeż tal-qorti. Huwa ngħata wkoll ordni ta’ sentejn projbizzjoni mil-logħob tal-football.
Biggs ġie mgħarraf li akkuża separata li daħal illegalment fil-ground kienet twaqqgħet.
