Sqalli ta’ 44 sena, li jaħdem bħala kaxxier, kien mixli bil-pussess u importazzjoni tad-droga kokaina.
Fabio Palumbo tressaq aktar kmieni quddiem il-Maġistrat Rachel Montebello fejn wieġeb mhux ħati tal-akkużi miġjuba kontra tiegħu.
Huwa kien wieħed minn tlitt irġiel li ġew arresti s-Sibt li għadda, wara li l-Pulizija ġabret informazzjoni li allegatament kien se jsir trasferiment ta’ droga f’pajjiżna.
Il-Pulizija kienet bdiet osservazzjoni fuq vettura li fiha kien hemm Taljan. Wara xi ħin, il-pulizija ċċirkondaw il-vettura f’San Pawl il-Baħar u minn tfittxija f’basket instabu għaxar pakketti li b’kollox jammontaw għal 10 kilogrammi sustanza suspettata droga kokaina.
Fl-istess ħin, il-pulizija kompliet bl-osservazzjoni fuq iż-żewġ persuni l-oħra – Taljan u Albaniż, it-tnejn ta’ 40 sena – li ġew arrestati ftit tal-ħin wara f’Ħal Qormi.
Mill-investigazzjonijiet li saru jirriżulta li d-droga misjuba kienet tlaħħaq ‘il fuq minn €1.3 miljun fis-suq.
Palumbo baqa’ jinżamm taħt arrest preventiv wara li ma saret l-ebda talba għall-ħelsien mill-arrest tiegħu.
L-Avukati Jacob Magri, Frank Anthony Tabone u Arthur Azzopardi dehru għall-imputat.
