Duncan Debono ta’ 48 sena residenti Bormla baqa’ jinżamm arrestat wara li kien mixli li kiser diversi kundizzjonijiet imposti fuqu mill-Qorti fosthom li kien barra meta suppost kien qiegħed f’daru.
L-Ispettur Gabriel Kitcher spjega quddiem il-Maġistrat Claire Stafrace Zammit li dan ir-reat seħħ fil-lejl ta’ bejn is-27 u t-28 ta’ Marzu li għadda.
Il-prosekuzzjoni spjegat kif fil-lejl imsemmi daħlu diversi rapporti dwar serq minn vetturi u l-akkużat kien identifikat minn filmati fejn deher jisraq.
L-imputat twaqqaf għall-ħabta ta’ nofs il-lejl u meta saret tfittxija fuqu nstablu torch. Ftit tal-ħin wara li ġie arrestat qal li kellu wġiegħ f’sidru u għalhekk ittieħed l-Isptar Mater Dei.
Id-difiża qalet li filwaqt li hu kellu jkun għand ommu, irrimarkat li ommu għandha 92 sena u kellha bżonn l-għajnuna. Kien għalhekk li hu kien sejjer għand oħtu biex tkun tista’ tmur tgħid lil ommhom.
Il-Prosekuzzjoni qalet li darb’oħra messu ċempel l-għassa u informhom biċ-ċirkustanzi u mhux jaqbad u joħroġ.
L-akkużat wieġeb mhux ħati għall-akkużi miġjubin kontrih u d-difiża talbet għall-ħelsien mill-arresta imma l-prosekuzzjoni oġġezzjonat bil-Maġistrat Stafrace Zammit ċaħdet it-talba.