Mahmoud Mustafa Mohammed Aldabah, Libjan li jgħix is-Swieqi, tressaq il-qorti fuq akkużi li kiser żewġ settijiet ta’ kundizzjonijiet tal-ħelsien mill-arrest. Il-prosekuzzjoni allegat li din hija l-ħames darba li kiser dawn il-kundizzjonijiet. Hu wieġeb mhux ħati għall-akkużi miġjuba kontrih.
Il-prosekuzzjoni qalet lill-qorti li għall-ħabta tat-3:15am tat-8 ta’ April, uffiċjala tal-pulizija li kienu qed jagħmlu ronda fuq it-taraġ ta’ Triq Santa Rita f’Paceville raw lill-imputat quddiem ħanut tal-ikel. L-uffiċjala għarfuh, iżda allegaw li meta staqsewh, hu tahom isem falz. Peress li d-dokumenti tal-identità tiegħu bħalissa jinsabu fi ħdan il-qorti, Aldabah ittieħed l-għassa ta’ San Ġiljan, fejn arrestawhw minnufih.
Il-pulizija akkużah talli kiser kundizzjonijiet tal-ħelsien mill-arrest imposti fuqu minn żewġ digrieti separati tal-Qorti tal-Maġistrati, wieħed maħruġ fis-16 ta’ Diċembru 2021 mill-Maġistrat Ian Farrugia u ieħor fil-21 ta’ Jannar 2025 mill-Maġistrat Claire Stafrace Zammit, fejn instab li kien qed isuq mingħajr liċenzja u assigurazzjoni. Hu akkużat wkoll li rrifjuta jagħti d-dettalji korretti tiegħu, jew li ta dettalji foloz, lil uffiċjal pubbliku waqt il-qadi ta’ dmirijietu.
Aldabah kien ukoll marbut ma’ proċeduri fejn il-ko-akkużat Mohaned Ali Ahmed Massarati aktar tard instab ħati li pprova jinfluwenza xhud fil-każ ta’ ħasil ta’ flus ta’ “Lilu King”, u ngħata sentenza ta’ ħabs sospiża, filwaqt li Aldabah innifsu nħeles minn dawn l-akkużi. Sorsi qalu lill-MaltaToday li l-akkużat jistqarr li “Lillu King” huwa ħuh, imma huwa kkonfermat li fil-fatt mhuwiex.
Il-prosekuzzjoni staqsiet kif l-imputat jista’ jgħid li jaħdem bħala sewwieq tal-kunsinni meta allegatament m’għandux liċenzja. Id-difiża wieġbet li hija t-tfajla tiegħu li ssuq, filwaqt li hu sempliċiment iwassal l-ikel.
Fis-sottomissjonijiet dwar il-ħelsien mill-arrest, id-difiża argumentat li Aldabah kien qed jipprova jtejjeb ħajtu u qalet li ċ-ċaħda tal-ħelsien mill-arrest ma tgħinx il-progress li kien qed jagħmel. Iżda l-prosekuzzjoni insistiet li l-ksur ripetut tiegħu juri li mhuwiex wieħed li josserva l-kundizzjonijiet.
“L-imputat jidher li ma jridx jitgħallem; ma jridx jobdi” insistiet il-prosekuzzjoni.
Il-qorti għamlet ukoll kumment ċar dwar l-imġiba tat-tfajla tal-imputat fil-qorti, wara li dehret iżżomm u tbewwes idejh waqt is-seduta.
Il-qorti ċaħdet it-talba għall-ħelsien mill-arrest.
L-Ispettur Jean Paul Attard mexxa l-prosekuzzjoni filwaqt li l-avukat Noel Bianco rrappreżenta lill-imputat.
Il-Maġistrat Antoine Agius Bonnici ppreseda fuq is-seduta.