Tanio Spiteri ta’ 41 sena, residenti Birkirkara, tressaq b’arrest mill-pulizija quddiem il-Qorti fejn ġie mixli bi traffikar tad-droga.
Wara li l-Maġistrat Rachael Montebello semgħet lill-pulizija jgħidu x’wasslu biex Spiteri jitressaq il-Qorti, kif ukoll l-akkużat ċaħad kull akkużat kontrih, ordnat biex jibqa’ jinżamm arrestat.
Fil-jiem li ġejjin mistennija tibda l-kumpilazzjoni kontra l-akkużat.
11.20am – Raġel ta’ 41 sena arrestat ma’ allegat sejba ta’ droga
Investigazzjonijiet mill-Pulizija b’rabta ma’ allegat traffikar ta’ droga wasslu għall-arrest ta’ raġel ta’ 41 sena residenti Birkirkara.
Wara osservazzjoni fuq garaxx fil-Marsa, li fih allegatament kienet qiegħda tkun ittraffikata d-droga, ilbieraħ wara nofsinhar, il-Pulizija nnutaw l-allegat suspettat jidħol fil-garaxx u wara ftit ħin deher joħroġ u jirkeb ġo vettura. Kien hawn li huwa ġie ċċirkondat u arrestat.
Minn tfittxijiet li saru fuqu u fil-vettura, il-Pulizija elevat numru ta’ qratas b’sustanza suspettata droga kokaina. Minn aktar tfittxijiet li saru fil-garaxx instabet aktar drog suspettata kokaina u ammont konsiderevoli suspettata ħaxixa tal-kannabis, kif ukoll mwieżen diġitali u diversi oġġetti relatati mat-traffikar tad-droga.
Il-Maġistrat tal-Għassa Dr Rachel Montebello LL.D ġiet infurmata bil-każ u ħatret inkjesta.
Ir-raġel mistenni jitressaq il-Qorti ftit tal-ħin ieħor quddiem il-Maġistrat tal-Għassa, b’akkużi relatati ma’ dan il-każ.
