Minn Cristian Muscat
Il-lokalità ta’ Raħal Ġdid kisbet unur li ftit bliet jistgħu jiftaħru bih meta ġiet uffiċjalment proklamata l-Belt Ewropea tal-Isport 2026. It-tħabbira saret f’ċerimonja ferm sabiħa fil-Parlament Ewropew fi Brussell waqt l-ACES Gala, attività annwali li tiġbor flimkien rappreżentanti minn diversi bliet Ewropej li ġew rikonoxxuti għall-kontribut tagħhom fl-isport u fl-attività fiżika.
Fost dawk preżenti kien hemm il-Kunsillier Darren Lynch, rappreżentant attiv tal-komunità Pawlista fil-qasam sportiv, li esprima l-kburija tiegħu li ħa sehem f’dan il-mument storiku. Il-President tal-Parlament Ewropew Roberta Metsola awgurat personalment lil Raħal Ġdid u faħħret il-ħidma kollettiva li wasslet għal dan ir-rikonoxximent prestiġjuż.
F’kummenti li xxerred fuq il-paġni soċjali tiegħu, Darren Lynch spjega kemm kien importanti għalih li jkun hemm f’din iċ-ċerimonja li tagħti lil Raħal Ġdid post speċjali fuq il-mappa sportiva Ewropea. Aħna ħadnilu intervista esklussiva proprju meta kien fi Brussell fejn tana aktar informazzjoni dwar dak li ġej is-sena d-dieħla.
“Inħossni kburi li rrapreżentajt lill-Pawlisti f’wieħed mill-ogħla istituzzjonijiet tal-Unjoni Ewropea,” kiteb.
Imma kif waslet il-belt ta’ Raħal Ġdid għal dan il-mument? X’kien hemm warajh? U x’se jfisser dan għas-sena 2026?
Lynch kien ferm emozzjont wara din il-kisba u spjega fid-dettall il-vjaġġ twil li wassal għal din il-kisba, il-proċess ta’ valutazzjoni, il-preparamenti, u x’hemm ippjanat għas-sena li ġejja.
“Dan mhux proċess li beda lbieraħ. Ilna xhur nippjanaw, nikkordinaw u naħdmu biex Raħal Ġdid ikun f’pożizzjoni soda biex jikseb dan ir-rikonoxximent,” qal Lynch. Huwa spjega li l-proċess kien wieħed estensiv u strutturat, li beda b’ħidma interna fil-lokalità u kompla b’eżami dettaljat mill-organizzazzjoni ACES Europe.
Delegazzjoni tal-ACES żaret Malta biex tara b’għajnejha x’inhu offrut minn din il-lokalità. “Kellna delegazzjoni sħiħa li ġiet biex tanalizza l-faċilitajiet tagħna, x’qed nagħmlu, u x’tip ta’ komunità sportiva għandna.”
Lynch jenfasizza li l-vantaġġ ta’ Raħal Ġdid tinsab fl-għadd kbir ta’ faċilitajiet sportivi u l-attività kontinwa li ssir matul is-sena. “Ftit irħula jistgħu jgħidu li għandhom il-firxa ta’ sport li għandna aħna: football, hockey, padiljun sportiv, volleyball, basketball u l-lista ma tieqaf qatt.”
L-infrastruttura u l-attivitajiet kontinwi kienu fatturi kruċjali biex Raħal Ġdid jirbaħ dan it-titlu. “Meta morna fl-Ewropa biex nippreżentaw il-proġetti u l-viżjoni tagħna, kien ċar li l-isforzi tagħna kienu apprezzati.”
Darren Lynch faħħar ukoll l-appoġġ li kellu mill-kollegi tiegħu fil-Kunsill Lokali, inkluż Roderick Caruana u Melanie, kif ukoll mis-Sindku Dominic Grima li ħadem qatigħ f’din l-inizjattiva sa mill-ewwel ġurnata.”
“Konna privileġġjati li nkunu qed naħdmu bħala tim. Din mhix kisba tiegħi jew ta’ xi ħadd wieħed iżda waħda tal-komunità Pawlista kollha.”
Matul iż-żjara tagħhom fi Brussell, il-kunsilliera ġew milqugħa fl-uffiċċju tal-President tal-Parlament Ewropew Roberta Metsola. Lynch jiddeskrivi dan il-mument bħala wieħed speċjali ħafna.
“Meta ltqajna mal-President Metsola, faħħritilna l-inizjattiva u x-xogħol li qed nagħmlu. Hija awguratilna suċċess u qalet li rikonoxximent bħal dan jagħti prestiġju lil Malta kollha.”
Wieħed mill-aktar aspetti eċċitanti ta’ dan it-titlu huwa l-impatt dirett li se jkollu fuq is-sena 2026 f’Raħal Ġdid. “Se jkollna sena 2026 sħiħa mimlija attivitajiet sportivi, kompetizzjonijiet, wirjiet u inizjattivi għall-komunità kollha.”
Lynch jisħaq li mhux se jiffoka biss fuq l-atleti elite, iżda fuq il-komunità kollha: tfal, adulti, anzjani u anke persuni li qatt ma kienu involuti fl-isport. “Qed nippreparaw kalendarju estensiv li jinkoraġġixxi lil kulħadd jieħu sehem.”
Delegazzjonijiet barranin se jiġu mistiedna Malta sabiex jaraw il-faċilitajiet, isiru skambji u tissaħħaħ il-kollaborazzjoni mal-bliet l-oħra li għandhom l-istess titlu. “Stedinhom jiġu f’pajjiżna, f’postijiet storiċi tagħna, biex jiltaqgħu magħna u jaraw x’joffri Raħal Ġdid.”
Lynch jgħid li għalih personali l-isport mhuwiex biss passatemp iżda stil ta’ ħajja.
“Għandi mħabba kbira lejn l-isport, u dan il-proġett jagħmilni aktar determinat biex inkomplu ntejbu l-komunità tagħna.”
Mistoqsi dwar il-messaġġ tiegħu għal dawk li forsi qatt ma ppruvaw jidħlu fid-dinja sportiva, hu qal b’leħen pożittiv:
“L-isport huwa tajjeb għas-saħħa fiżika u għas-saħħa mentali. Meta tkun involut fl-isport, ikollok ħafna vantaġġi: tħossok aħjar, tkun parti minn komunità, u tgħix ħajja aktar bilanċjata.”
Għalih, wieħed mill-aktar elementi importanti huwa li l-isport għandu l-qawwa li jgħaqqad. “Ma jimpurtax min int jew minn fejn ġej għax l-isport jgħaqqadna u jagħtina spazju fejn nikbru flimkien.”
Ir-rikonoxximent tal-Belt Ewropea għall-Isport 2026 mhux biss juri l-ħidma li saret s’issa, iżda wkoll il-potenzjal enormi ta’ Raħal Ġdid għall-futur.
Dan it-titlu jpoġġi lill-lokalità fuq livell Ewropew, jagħti bidu għal opportunitajiet ġodda, jattira investiment u jkabbar l-ispirazzjoni fost il-komunità kollha.
Għal Darren Lynch, din hija kumbinazzjoni perfetta bejn l-imħabba tiegħu lejn l-isport u x-xewqa li jservi lill-komunità. U għal Raħal Ġdid, din hija xhieda ta’ kemm jista’ jagħmel lokal żgħir b’qalb kbira u bi spirtu ta’ għaqda.
Raħal Ġdid, Belt Ewropea tal-Isport 2026 jinkorpora flimkien komunità li tħares ’il quddiem bi kburija u determinazzjoni.