Kienet persuna li tgħix fit-triq iċ-Ċinju fil-Mosta li għamlet rapport li semgħet ħoss qawwi ta’ splużjoni. Mill-ewwel fuq il-post mar tim mediku mill-Isptar Mater Dei li talab l-assistenza tal-Ħaddiema tal-Protezzjoni Ċivili.
Il-ħaddiema tal-Protezzjoni Ċivili mill-ewwel beda jipprovaw jistabbilixxu r-riħa ta’ gass minn fejn kienet ġejja tant li daħlu f’residenzi u tkellmu ma’ xi persuni li jgħixu fi triq imsemmija.
Min-naħa tagħhom uffiċjali tal-Pulizija għalqu t-triq għat-traffiku biex jassiguraw li ma hemm l-ebda periklu.
Fortunatament it-tfittxija rriżultat fin-negattiv u għalhekk ġie ċċertifikat li ma kien hemm l-ebda periklu għar-residenti.
Aktar kmieni: Il-Pulizija qed tinvestiga ħoss ta’ splużjoni fil-Mosta
Kien għall-ħabta tal-11.45am meta għand il-Pulizija daħal rapport li fi Triq iċ-Ċinju fil-Mosta nstema’ ħoss ta’ splużjoni.
Mill-ewwel fuq il-post marru uffiċjali tal-pulizija kif ukoll tim mediku mill-Isptar Mater Dei. It-triq tinsab magħluqa għat-traffiku sakemm tiġi stabbilità d-dinamika tal-każ.
Fuq il-post waslu wkoll uffiċjali tal-Protezzjoni Ċivili.
Persuni fuq il-post qalulna li fi triq tinxtamm riħa ta’ gass. Bħalissa uffiċjali tal-Protezzjoni Ċivili qegħdin jidħlu f’xi residenti biex jipprovaw jistabilixxu minn fejn ġejja r-riħa tal-gass. Dan filwaqt li l-pulizija qed jinvestigaw ir-rapport li daħal li nstemgħet splużjoni.
Aktar dettalji kif jaslulna…
