Il-midfielder ta’ Lyon, Rayan Cherki, qal li ‘joħlom’ li jilgħab ma’ Real Madrid fil-futur.
Iż-żagħżugħ ta’ 18-il sena ddebutta ma’ Les Gones matul l-istaġun 2019-20 u minn dakinhar stabbilixxa ruħu bħala player importanti għall-club, fejn għamel 44 dehra fil-kompetizzjonijiet kollha, skorja seba’ goals u pprovda sitt assists fil-proċess.
Cherki żvela li huwa determinat li “jagħmel l-istorja ma’ Lyon”, iżda l-ex internazzjonali ta’ Franza ta’ taħt is-16-il sena għandu x-xewqa li jilgħab ma’ Real Madrid f’xi punt fil-karriera tiegħu.
“It-triq perfetta tkun din li ġejja, nagħmel l-istorja ma’ Lyon u mbagħad nagħmilha ma’ clubs oħra”, qal Cherki.
“Aħna lkoll nafu li l-club tal-ħolm tiegħi huwa Real Madrid. Li nissieħeb mal-akbar club tad-dinja tkun xi ħaġa mill-isbaħ. Dik hija r-rotta perfetta u dik li għandi f’moħħi. Kull filgħodu nqum b’dan f’moħħi u li nkompli nwettaq il-ħolm tiegħi. “
Cherki lagħab 60 minuta fl-ewwel logħba tal-Ligue 1 fl-istaġun 2021-22 ta’ Lyon kontra Brest fis-7 ta’ Awwissu iżda kien sostitut mhux utilizzat fl-aħħar tliet logħbiet tal-kampjonat tat-team tiegħu.