Hibernians ………0
Marsaxlokk ………1
Minn Cristian Muscat
Marsaxlokk kisbu rebħa minima, iżda ferm meritata bl-iskor ta’ 1-0 kontra Hibernians, f’partita li mmaturaw fit-tieni taqsima bil- konsegwenza li setgħu skorjaw aktar goals.
Ta’ nota huwa l-fatt li għat-tieni partita konsekuttiva, il-goalkeeper Matthew Calleja Cremona, iddefenda l-lasti ta’ Marsaxlokk minflok dak titulari, is-Serb Marko Drobnjak.
Kienu Hibernians li ħolqu l-ewwel periklu fit-12-il minuta meta Bjorn Kristensen kellu xutt mid-distanza li għadda għoli.
Marsaxlokk wieġbu ħames minuti wara permezz ta’ xutt mis-Slovakk Martin Adamec li wkoll intemm għoli.
Huma komplew jiddettaw il-logħob u fit-23 minuta xutt ta’ Sergo Kukhianidze intemm ftit barra.
Fid-39 minuta, Hibernians resqu viċin meta Jurgen Degabriele b’eleganza indirizza xutt lejn is-saqaf tax-xibka iżda sab lil Calleja Cremona attent li salva f’corner b’mod stupend.
Iżda kontra x-xejra tal-logħob, eżatt qabel tmiem l-ewwel taqsima, Marsaxlokk fetħu l-iskor meta ALEX DE AGUILAR GOMES approfitta minn cross fuq ix-xellug u mill-viċin irtokka l-ballun fix-xibka biex daħħal lit-team tiegħu jistrieħ b’goal vantaġġ.
Fild-49 minuta, Marsaxlokk appellaw għal penalty meta Alex De Aguilar Gomes kellu xutt li deher li ħabat ma’ id id-difensur ta’ Hibernians, Kurt Shaw, iżda r-referee Ishmael Barbara ħalla l-logħob għaddej.
Ħames minuti wara, Yuri De Jesus Messias għadda lejn id-debuttant Jorge Ailton Soares li kellu x-xutt tiegħu salvat tajjeb mill-goalkeeper, Hugo Sacco.
Fil-65 minuta, l-istess De Jesus Messias kellu tentattiv imblukkat fil-ħin minn Shaw.
Fis-76 minuta, ix-Xlukkajri reġgħu heddew iżda t-tentattiv ta’ Soares ġie devjat f’corner. Lejn it-tmiem, De Jesus Messias ġie antiċipat fil-ħin hekk kif deher li seta’ jagħmel xi forma ta’ ħsara.
HIBERNIANS: 30-Hugo Sacco, 4-Alfred Silas (14-Dexter Xuereb 79), 5-Kurt Shaw, 6-Lucas Caruana (7-Lucas Villela 67), 8-Rodrigo Fraga, 10-Jurgen Degabriele, 11-Bjorn Kristensen, 20-Federico Falcone, 22-Ilas Martinis, 31-Pedro Henrique Nunes Silva (23-Matthew Ellul 55), 99-Gabriel Hugo Fernandes – Coach: Branko Nisevic
MARSAXLOKK: 1-Matthew Calleja Cremona, 4-Karl Micallef, 6-Nikolai Muscat, 9-Sergo Kukhianidze (5-Jorge Ailton Soares 59), 10-Yuri De Jesus Messias, 19-Jose Ulises Arias (8-Jake Ghio 82), 20-Martin Adamec, 22-Lucas Emanuel Lopez, 23-Alex De Aguilar Gomes, 24-Enmy Manuel Pena Beltre (3-Duvan Torres 41), 27-Leandro Aguirre – Coach: Vincenzo Potenza
REFEREE: Ishmael Barbara
ASS. REFEREES: James Muscat, Duncan Spencer
RABA’ UFF: Daniel Portelli
SKORER: A. De Aguilar Gomes 45 (M)
AMMONITI: K. Micallef, J. Ghio (M), F. Carvalho, K. Fraga, H. G. Alves (H)Rebħa li setgħet kienet ferm akbar