Minn Cristian Muscat
MALTA ………2
KUWAJT …….0
Wara r-rebħa ta’ 1-0 fuq l-Azerbaijan ta’ nhar il-Ġimgħa li għadda, f’partita oħra ta’ ħbiberija Malta għelbet lil Kuwajt bl-iskor ta’ 2-0 f’rebħa meritata li saħansitra setgħet kienet akbar.
Issa li qed nitgħallmu kif intellgħu l-ballun minn wara … irridu nitgħallmu wkoll kif inkunu aktar inċiżivi!
Fl-ewwel taqsima, il-Maltin damu xi ftit ma ssetiljaw iżda b’mod gradwali bdew jirbħu l-inizjattiva biex prattikament bdew jiddettaw il-logħob bil-Kuwajti jilagħbu t-tattika ta’ konteniment u bdew joperaw bil-kontrattakki li prattikament ftit li xejn kienu effettivi ħlief għal żball li kkommettejna fid-difiża li kien se jissarraf f’goal.
Iż-żewġ goals waslu f’mument kruċjali li komplew jagħtu injezzjoni morali lill- benjamini tagħna.
Fit-tieni taqsima, l-avversarji ħarġu jfittxu l-goal biex jidħlu fil-logħba iżda l-Maltin irnexxielhom jassorbu l- pressjoni tagħhom u bil-mod il-mod bdew joħorġu mid- difiża u reġgħu bdew jiddominaw … li iżda fallew bosta opportunitajiet ta’ skor.
Mir-rebħa ta’ 1-0 fuq Azerbaijan, il-coach Devis Mangia wettaq tliet bidliet fejn bdew Jonathan Magri Overend, Enrico Pepe u Dunstan Vella minflok Ryan Camenzuli, Brandon Paiber u Andrei Agius li proprju rtira mit-team nazzjonali Malti wara 103 partiti.
Il-partita fetħet b’attakk korali tal-Maltin fejn il- konklużjoni perikoluża ta’ Jurgen Degabriele ġiet salvata mill-goalkeeper Ahmad Al Khaledi.
Fl-10 minuta, Jean Borg tilef il-pussess tal-ballun fis-settur ta’ nofs il-ground biex Mobarak Al Faneeni approfitta u żmarka lil Ahmad Al Dhefeery li iżda ġie antiċipat fil-ħin minn Joseph Mbong qabel seta’ jagħmel xi forma ta’ ħsara.
Fis-16-il minuta stajna ftaħna l-iskor meta Joseph Mbong bidel il-ballun ma’ Alex Satariano, avvanza fuq il-lemin … daħal fil-kaxxa … iżda l-ballun lejn Degabriele, li kien ġej bil-ġirja, ma kienx preċiż biex dan tal-aħħar żbilanċja ruħu bil- konsegwenza li x-xutt finali tiegħu ma nkwadrax il-lasti.
Fit-23 minuta, l-avversarji tagħna resqu ferm viċin li jiftħu l-iskor meta waqt li kienu qed idawru l-ballun bejniethom, il-Maltin tilfu l-pussess meta Jean Borg xeħet dirett lejn Al Dhefeery li minn barra l-kaxxa pprova jillobja fuq Henry Bonello iżda daqstant ieħor kien providenzjali l-goalkeeper Malti li dawwar f’corner.
Iżda fid-29 minuta, il-Maltin fetħu l-iskor meta mill-free-kick ta’ Teddy Teuma, il-ballun ħabat mal-barriera avversarja u fit-tenattiv li jikklerja l-periklu, Khaled Al Fadhli ma laqatx il-ballun sew biex ALEX SATARIANO kien pront jixxuttja bl-istess ballun jiġi devjat minn Fahed Al Hajeri u jinżel għal ġox-xibka minkejja t-tentattiv iddisprat mill-goalkeeper Al Khaledi u Fawaz Al Otaibi li weġġa’ u kellu jinbidel.
Il-goal ta’ Satariano kien il-120 wieħed għal Malta fil-partiti ta’ ħbiberija.
U appena għaddew erba’ minuti, il-Maltin irduppjaw meta TEDDY TEUMA rebaħ il-ballun fi tliet kwarti ta’ ground, bidel il-ballun ma’ Satariano u b’xutt li ma jaħfirx sammar il-ballun fix-xibka biex skorja l-ewwel goal tiegħu għal Malta.
Fil-ftuħ tat-tieni taqsima, il-Kuwajti ħarġu aktar avventurużi u xeħtu lill-players Maltin jiddefendu għall- ewwel minuti.
Madankollu kienu l-Maltin li reġgħu heddew iżda wara xogħol tajjeb ta’ Mbong ma kien hemm l-ebda player Malti taħt il-lasti avversarji biex jixħet il-ballun fix-xibka.
Fit-62 minuta, kellna opportunitá meta Teuma għeleb in-nasba tal-offside, avvanza waħdu iżda ġibed kemmxejn lejn ix-xellug biex il-konklużjoni tiegħu ġiet salvata bi tbatija minn Al Khaledi.
Fis-70 minuta kien imiss lis-sostitut Luke Montebello li minn tarf il-kaxxa falla ċans tad-deheb bil-ballun jgħaddi ma’ sieq il-lasta.
Fis-87 minuta, Henry Bonello wettaq save kuraġġuż fuq Bader Al Mutawa biex evita goal ċert.
MALTA: 1-Henry Bonello, 4-Steve Borg (22-Zach Muscat 58), 5-Jean Borg, 6-Matthew Guillaumier (10-Steve Pisani 73), 7-Joseph Mbong (3-Ryan Camenzuli 73), 13-Enrico Pepe, 14-Alex Satariano (Jake Grech 83), 17-Teddy Teuma (Brandon Paiber 82), 18-Jurgen Degabriele (9-Luke Montebello 58), 19-Adam Magri Overend, 21-Dunstan Vella – Coach: Devis Mangia
KUWAJT: 22-Ahmad Al Khaledi (1-Hussain Kankone 69), 2-Sami Al Sanea, 3-Ahmad Al Dhefeery, 5-Fahed Al Hajeri, 8-Fawaz Al Otaibi (10-Talal Al Fadhel 46), 11-Fahed Al Ebrahim (6-Sultan Al Enezi 46), 12-Khaledd M Al Fadhli (21-Ali Issa 46), 13-Fahad Al Reshidi, 14-Redha Abujabarah (17-Bader Al Mutawa 46), 16-Mobarak Al Faneeni (20-Yousef Alsulaiman 80), 19-Ebrahim Marzouq – Coach: Vitezlav Lavicka
REFEREE: Thomas Owen (Wales)
ASS. REFEREES: Lewis Edwards, Jonathan Bryant (Wales)
RABA’ UFF: Stefan Pace
SKORERS: A. Satariano 29, T. Teuma 33 (M)
AMMONITI: F. Al Otaibi, E. Marzouq (K)
