Wara li ġiet fi tmiema l-ewwel ġurnata tal-Kampjonat Ewropew għal sewwieqa amateurs, il-Malti Redent Magro jinsab fit-tieni post tal-klassifika punt biss taħt il-Belġjan Piet Van Pollaert.
Fl-ewwel tiġrija Redent Magro kien fl-azzjoni bin-numru 8 Grillon d’Ostal. Wara tluq veloċi li rah imur fuq quddiem, ċeda r-rail iżda 700m mit-tmiem kien evidenti li ma kellux biex jikkompeti u kellu jikkuntenta bit-8 post.
Fit-tieni tiġrija kellu jsuq id-debba bin-numru disgħa Elite Sport. Tluq tajjeb wara iż-żiemel bin-numru wieħed rah imur mill-ewwel fit-tieni post fejn Redent baqa jistaporti sal-aħħar 300 metru qabel ma mar jagħmel l-attakk tiegħu fejn f’tiġrija misjuqa perfettament irnexxielu jakkwista t-tieni post.
Biex għalhekk wara l-ewwel ġurnata tal-kompetizzjoni naraw lill-Belġjan Piet Van Pollaert jokkupa l-ewwel post b’19-il punt wara li kien spiċċa fir-raba’ u l-ħames post rispettivament.
Bit-tmien post u t-tieni post, Redent Magro akkwista total ta’ 18-il punt li jfisser li qed jokkupa t-tieni post. Punt inqas fit-tielet post insibu lin-Norveġiż Roar Hop bi 17-il punt.
Il-kompetizzjoni tidher waħda kompetittiva fejn kollox issa jiddependi fuq ir-riżultati li se jinkisbu għada fiż-żewġ tiġrijiet li se jsir fil-korsa ta’ Manacor.
- 1. Piet Van Pollaert (Belġju) – 19
- 2. Redent Magro (Malta) – 18
- 3. Roar Hop (Norveġja) – 17
- 4. Tomas Linder (Svezja) – 16
- 5. Jani Suonpera (Fillandja) / Johann Preining Jr (Awstrija) – 15
- 7. Miquel Vich Capo (Spanja) – 14
- 8. Soeren Andersen (Danimarka) – 13
- 9. Zoltan Gyolai (Ungerija) / Erik Van den Bergh (Olanda) – 12
- 11. Massimo de Luca (Italja) – 9
- 12. Joey Vignoni (Svizzera) – 8
- 13. Simon Siebert (Ġermanja) – 2
