Malta Public Transport qed tħabbar rekord ta’ 5.8 miljun passiġġier li vvjaġġaw bil-karozza tal-linja madwar il-gżejjer Maltin matul Mejju 2023. Dan ir-rekord ġdid jaqbeż it-tragward preċedenti ta’ 5.7 miljun passiġġier irreġistrat f’Awwissu 2019.
“It-tkabbir konsistenti tal-passiġġieri huwa indikattiv li l-fiduċja fit-trasport pubbliku qed tissaħħaħ. Fil-fatt, il-perċentwal ta’ nies li jivvjaġġaw bil-linja, meta mqabbel ma’ vjaġġar b’karozza privata jew mezzi oħra ta’ trasport, żdied għal 11% fl-2023, minn 8% fl-2021. Dan jirrappreżenta bidla modali pożittiva lejn it-trasport pubbliku,” qal Konrad Pulé, General Manager ta’ Malta Public Transport. “Issa qed isir kritiku li tiġi sostnuta din ix-xejra pożittiva billi jiġu introdotti miżuri prijoritarji tal-karozzi tal-linja li jagħmlu l-ħinijiet tal-vjaġġ iqsar u aktar puntwali. Dan iħeġġeġ aktar nies biex jaqilbu mill-karozzi privati għall-karozza tal-linja.”
Malta Public Transport qed tħabbar ukoll il-bidu tas-servizz tas-Sajf li jibda mill-Ħadd, 11 ta’ Ġunju, 2023. Dan is-servizz se jkun fih karozzi tal-linja aktar frekwenti fuq numru ta’ rotot, b’550 vjaġġ bil-karozza tal-linja addizzjonali kuljum, u servizz estiż tal-karozzi tal-linja lejn bajjiet popolari.
L-iskedi tal-bus stops madwar il-gżejjer bħalissa qed jiġu aġġornati. Sadanittant il-passiġġieri huma mfakkra li informazzjoni f’ħin reali dwar il-wasla tal-karozzi tal-linja huma disponibbli b’xejn fuq it-Tallinja App, kif ukoll permezz tal-kodiċijiet QR f’kull bus stop.
Malta Public Transport tesprimi l-gratitudni tagħha lill-passiġġieri kollha għall-fiduċja u l-appoġġ kontinwu tagħhom. Meta jagħżlu li jivvjaġġaw b’mod sostenibbli bil-karozza tal-linja, kull passiġġier ikun qed jikkontribwixxi biex jitnaqqas il-konġestjoni tat-traffiku u l-emissjonijiet fit-toroq tagħna.
