Il-livell tad-diskors politiku f’dan il-pajjiż niżel f’livelli li qatt ma rajna qabel. Il-President Onorarju tal-NGO ‘Repubblika’, li jippreżenta lilu nnifsu bħala l-protettur tar-rule of law, wasal biex isejjaħ lill-Gvern Laburista ‘mafia’ u jqabbel lill-Partit Laburista ma’ marda infettiva. Dan mhux biss attakk mimli mibegħda, imma retorika tossika li tmur kontra kull prinċipju ta’ rispett demokratiku.
Matul il-kampanja elettorali, kont nisħaq ċar u tond: ‘Ġustizzja iva, persekuzzjoni le.’ U nerġa’ ngħidha llum: aħna mhux ta’ dak jew tal-ieħor – aħna lkoll tal-Partit Laburista. U meta jattakkaw wieħed minna, jattakkaw lilna lkoll.
Il-mibegħda li qed jimmiraw lejna mhi xejn ħlief tentattiv biex jintimidawna. L-arma tal-passat – għax dawn in-nies ma jinbidlu qatt. Imma aħna ma naqgħux għall-provokazzjoni. Ilkoll għandna responsabbiltà li nibqgħu forza għal ġid u progress, minkejja l-intimidazzjoni.
U ejja nfakkru lil min jipprova jagħti l-lezzjonijiet dwar il-liġi u r-regoli tad-demokrazija: dak li tant jippriedkaw mhux ir-rule of law, imma rule of law ‘à la carte’.
Meta l-liġi ma taqbilx magħhom, jattakkaw il-qrati. Meta d-deċiżjonijiet imorru kontra r-rieda tagħhom, jattakkaw lill-Kummissarju tal-Pulizija u lill-Avukat Ġenerali. U mbagħad jippruvaw jiddettaw il-moralità lill-poplu. Kliem vojt ta’ min tilef il-kredibbiltà u llum jipprova jibqa’ marbut ma’ poter falz.
Għax hekk jemmnu. Li għandhom dritt divin li jiggvernaw.
U lkoll niftakru x’għamlu meta kienu jiggvernaw.
Il-kriminali jingħataw maħfra presidenzjali. Il-Prim Ministru jiltaqa’ mal-kriminali ‘fis-satra tal-lejl’. L-art pubblika tingħata lill-benefatturi tagħhom biċ-ċiċri. L-avukati bil-passaport tal-PN jsiru mħallfin mil-lejl għan-nhar. U l-poplu jerfa’ l-piżijiet, bil-Prim Ministru ta’ dak iż-żmien jivvota bil-qalb kontra r-roħs tal-kontijiet.
U għandhom l-ardir jgħajru lil ħaddieħor mafia.
Tassew każ tal-ispiżjar milli jkollu jtik.
Quddiem dan kollu, illum, inġedded l-impenn li tajtkom fil-kampanja elettorali: li nibqa’ niddefendi lil kull Laburist kontra kull forma ta’ persekuzzjoni u intimidazzjoni.
Mhux bil-kliem biss, imma fejn hemm bżonn, bl-azzjoni wkoll. Għax attakk fuq wieħed minna huwa attakk fuqna lkoll.
Għalhekk, iktar minn qatt qabel, irridu nkunu magħqudin. Mexxej wieħed. Partit wieħed. Avversarju wieħed.
Jekk nibqgħu magħqudin, nibqgħu rebbiħin.
