| yan Degiorgio u Kohath Mallia, mill-Frejgatini Kategorija B tal-Kalkara Regatta Club, huma r-rebbieħa tat-TGS Fair Play Award li jkopri l-perjodu bejn Lulju u Settembru 2024.Dan il-premju ta’ kull tliet xhur huwa mogħti mill-Għaqda Ġurnalisti Sports flimkien mal-Malta Fair Play Movement, b’kollaborazzjoni ma’ Together Gaming Solutions. Dan il-premju huwa intiż għal dawk fil-qasam tal-isport kemm fuq livell individwali jew bħala tim għall-ġest altruwistiku ta’ fair play f’kompetizzjoni/ijiet uffiċjali jew le.Waqt l-aħħar edizzjoni tar-Regatta tal-Vitorja li saret nhar il-Ħadd 8 ta’ Settembru, il-crew tal-Frejgatini Kategorija B tal-Kalkara Regatta Club rebħu t-tiġrija. Ftit tal-ħin wara, indunaw li fuq il-frejgatina Bormliza il-pruwier Shaun Farrugia tah ħass ħazin u marru jassistuh minflok għadu jiċċelebraw ir-rebħa tagħhom, Sadanittant huma għamlu sinjal lill-paramediċi sabiex jiġu jkomplu jagħtuh l-għajnuna li kellu bżonn.Min-naħa tiegħu, Edward Licari Direttur ta’ Together Gaming Solutions qal, “Dan huwa eżempju ċar fejn l-altruwiżmu jiġi qabel kull tip ta’ kompetizzjoni. Prosit tassew lil Ryan Degiorgio u Kohath Mallia.”Il-preżentazzjoni tat-TGS Fair Play Award saret fl-uffiċini ta’ Together Gaming Solutions, fil-preżenza ta’ Andrea Critien mid-Dipartiment tal-Finanzi u r-Riżorsi Umani, u Edward Licari Direttur ta’ Together Gaming Solutions. Charles Camenzuli kien preżenti f’isem il-Malta Fair Play Movement, filwaqt li għall-Għaqda Ġurnalisti Sports kien hemm l-Amministratur Stephen Azzopardi.Individwi, timijiet, jew uffiċjali jistgħu jikkomunikaw mal-Għaqda Ġurnalisti Sports u mal-Malta Fair Play Movement biex jirrapurtawlhom att ta’ fair play billi jibagħtu email fuq [email protected], sabiex dan il-ġest ikun ikkunsidrat. Ritratt: (Mix-xellug) Edward Licari Direttur ta’ Together Gaming Solutions, Ryan Degiorgio u Kohath Mallia (Frejgatini Kategorija B tal-Kalkara Regatta Club), Charles Camenzuli (Chairman Malta Fair Play Movement) u Stephen Azzopardi (Amministratur GħĠS). |
Ryan Degiorgio u Kohath Mallia (Kalkara RC) jirbħu l-Fair Play Award
