Saħħet il-leġġendarju Brażiljan, Pelé, qed tkompli teħżien hekk kif sar magħruf li kanċer qed ikompli javvanza u jinfirex ma’ ġismu kollu.
Pelé, li għandu 82 sena, ilu tliet ġimgħat l-isptar u mistenni jqatta’ l-Milied hemmhekk.
Kelliem għall-isptar Albert Einstein qal li: “Il-marda tal-kanċer ta’ Pelé qed tipprogressa aktar u għaldaqstant jeħtieġ kura akbar minħabba li organi renali u kardijaċi mhux qed jiffunzjonaw.”
Pelé tneħħielu tumur fl-imsaren, f’Settembru 2021 u minn dakinhar kellu trattament regolari.
“Missieri mhux se jkun magħna d-dar fil-Milied,” kitbet bint Pelé, Kely Nascimento, fuq Instagram.
“Iddeċidejna mat-tobba li, għal diversi raġunijiet, ikun aħjar għalina li nibqgħu hawn bil-kura kollha li qed tagħtina din il-’familja ġdida’ f’Einstein.”
Fil-jiem li għaddew stqarrija tal-isptar kienet tgħid li “Pelé kellu rispons tajjeb għat-trattament għall-kura tal-infezzjoni respiratorja” u żiedet li kien għaddej minn “valutazzjoni mill-ġdid tat-trattament tal-kimoterapija.”
Peró issa saħħtu qed tmur lura b’mod gradwali.
