L-aħħar aġġornament mediku mill-Vatikan jgħid li l-kundizzjoni ta’ saħħet Papa Franġisku tjiebet xi ftit iżda huwa għadu f’qagħda kritika. Dan wara li nhar il-Ħadd, intqal li l-kundizzjoni tal-Papa kienet kritika bi problemi respiratorji u tal-kliewi.
Il-Vatikan issa qal li problema tal-kliewi ma kinitx kawża ta’ tħassib, aktar minn ġimgħa wara li l-Qdusija Tiegħu ddaħħal l-isptar. Il-Papa qed ikollu terapija bl-ossiġnu iżda t-tobba “b’mod prudenti għadhom ma żvelawx il-pronjosi.
Din hija ċertament l-aktar stqarrija pożittiva dwar is-saħħa tal-Papa fi ftit jiem, iżda l-kundizzjoni tiegħu għadha deskritta bħala kritika.
Madankollu, minkejja l-età ta’ 88 sena, il-Papa reġa’ beda xi xogħol u nhar it-Tnejn tkellem mal-Kappillan tal-Parroċċa ta’ Gaża biex jesprimi l-qrubija tiegħu miegħu, żied jgħid il-Vatikan.
Sorsi tal-Vatikan qalu li Franġisku ilu jiekol normalment, jista’ jiċċaqlaq u mhux imġiegħel joqgħod fis-sodda. M’għandu l-ebda deni, u l-ebda sinjal apparenti ta’ sepsis.
Ix-xogħol li ntqal li l-Papa kien qed jagħmel it-Tnejn wara nofsinhar kien “ħafif” – jaqra u jiffirma dokumenti.
Nhar is-Sibt, il-Vatikan qal li l-Papa esperjenza kriżi respiratorja u kien f’kundizzjoni “kritika”, iżda aktar tard il-Ħadd ħareġ aġġornament li “ma ppreżenta l-ebda kriżi respiratorja oħra”.
Nhar il-Ħadd, il-Papa ħareġ stqarrija fejn talab lill-Kattoliċi biex jitolbu għalih wara li ma setax iwassal personalment it-talb tradizzjonali tal-Angelus għat-tieni ġimgħa konsekuttiva.
Dawk il-kardinali li kienu jinsabu Ruma inġabru barra l-Bażilika ta’ San Pietru biex imexxu talb għall-Papa, flimkien ma’ membri tal-kurja tal-Vatikan u tal-kleru mid-Djoċesi ta’ Ruma.
Il-Papa huwa partikolarment suxxettibbli għall-pnewmonja, infezzjoni tal-pulmun li tista’ tkun ikkawżata minn batterji, viruses jew fungi, wara li fiż-żogħżija tiegħu kellu infjammazzjoni tal-pulmun – u għadda minn tneħħija parzjali tal-pulmun.
Il-mexxej tal-Knisja Kattolika Rumana ddaħħal l-isptar diversi drabi matul il-mandat tiegħu ta’ 12-il sena, inkluż li kien ikkurat għall-bronkite fl-istess sptar f’Marzu 2023.
Franġisku huwa l-ewwel Papa mill-Amerika Latin u l-ewwel Ġżwita li mexxa l-Knisja Kattolika Rumana.