Wieħed mill-passiġġieri li kienu jinsabu neqsin wara li l-vapur li kienu fuq nħakem min-nirien qrib il-gżira ta’ Korfù nstab ħaj u ġie salvat.
Skont l-awtoritajiet, il-passiġġier ntlemaħ fuq in-naħa ta’ wara tal-vapur wara li rnexxielu jagħmel kuntatt mal-uffiċjali tas-salvataġġ.
Għalkemm din kienet aħbar tajba, il-ħidma tibqa’ għaddejja bit-tama li jkunu salvati l-bqija tal-passiġġieri li għadhom neqsin li issa niżlu għal 11.
Fost dawk li għadhom rappurtati nieqsa u oħrajn li ġew salvati hemm xufiera tat-trakkijiet mill-Bulgarija, mill-Greċja, mit-Turkija u mil-Litwanja.
Skont rapporti fil-midja Griega jidher li x-xufiera għażlu li jibqgħu fit-trakkijiet tagħhom aktar milli jitilgħu jitħalltu mal-bqija tal-folla.
Il-vapur, Euroferry Olympia, propjetà tal-kumpanija Taljana Grimaldi Lines kien għadu kemm telaq mill-port ta’ Igoumenitsa fil-Greċja għall-port ta’ Brindisi fl-Italja meta nħakem min-nar.
Skont stqarrija uffiċjali tal-kumpanija, il-vapur kien qiegħed iġorr 239 passiġġier u 51 membru tal-ekwipaġġ. Madankollu l-gwardja tal-kosta Griega fl-aħħar sigħat qal li fost dawk salvati kien hemm żewġ Afgani li ma kinux reġistrati bħala passiġġieri fuq l-istess vapur.
