San Ġiljan ASC ħabbru li ffirmaw lill-plejer Kroat ta’ 34 sena, Maro Jokovic.
Marko Jokovic se jkun qed jingħaqad ma’ San Ġiljan ASC għall-kompetizzjonijiet tas-sajf li ġej.
Jokovic lagħab ma’ Brescia fl-istaġun 2020/21 u rebaħ il-Kampjonat Taljan u l-midalja tal-bronż fiċ-Champions League. Bħalissa, huwa jinsab fuq il-kotba ta’ Jug Dubrovnik.
Fil-biċċa l-kbira tal-karriera tiegħu, Jokovic lagħab mat-tim attwali tiegħu. Huwa rebaħ żewġ edizzjonijiet taċ-Champions League ma’ Jug fl-2006 u fl-2013, 13-il trofew fil-kampjonat nazzjonali kif ukoll erba’ darbiet it-Tazza Kroata.
Huwa rebaħ ukoll iċ-Champions League ma’ Pro Recco fl-istaġun 2014/15. Minbarra għal Jug, Pro Recco u Brescia, Jokovic lagħab għal Olympiacos bejn l-2019 u l-2020.
Huwa rebaħ total ta’ 38 trofew fil-kompetizzjonijiet għall-klabbs, u 20 mat-tim nazzjonali, inkluż deheb Olimpiku fl-2012, u fidda f’Rio de Janeiro fl-2016, żewġ midalji tad-deheb mill-Kampjonati tad-Dinja u id-deheb fil-Kampjonati Ewropej tal-2010.
