Saret b’suċċess edizzjoni oħra ta’ Il-Mixja tal-President, li ġabret flimkien lil eluf ta’ persuni li mxew għal Pjazza San Ġorġ, fil-Belt Valletta, b’risq il-Malta Community Chest Fund.
Din is-sena, il-Mixja tal-President introduċiet mill-ġdid rotta min-naħa ta’ isfel ta’ Malta, hekk kif il-parteċipanti nġabru kemm fil-Palazz ta’ Sant’Anton kif ukoll f’Raħal Ġdid għal għan nobbli.
Huma ngħaqdu wara l-E.T. Myriam Spiteri Debono, il-President ta’ Malta, il-Prim Ministru Robert Abela, l-Arċisqof ta’ Malta, Monsinjur Charles J Scicluna, u l-Kap tal-Oppożizzjoni Alex Borg f’din l-inizjattiva ilha ssir sa mill-2008.
Mal-wasla tagħhom quddiem il-Parlament ta’ Malta, il-parteċipanti kienu akkumpanjati minn banda tal-Għaqda Nazzjonali Każini tal-Banda, kif ukoll atleti ta’ Special Olympics Malta, li wassluhom sa Pjazza San Ġorġ.
Fid-diskorsi tal-ogħla awtoritajiet ta’ Malta, fi tmiem il-Mixja tal-President, spikka messaġġ komuni ta’ rikonoxximent għall-għaqda nazzjonali u ġenerożità, riflessi fil-parteċipazzjoni qawwija ta’ din is-sena, ta’ eluf ta’ persuni li nġabru flimkien u bid-donazzjoni tagħhom jagħmluha possibbli li l-Malta Community Chest Fund tgħin lil dawk kollha li jiġu fil-bżonn.
