Minn Cristian Muscat
Kif bdiet l-imħabba tiegħek lejn il-waterpolo?
Minn meta kont iżgħar l-isport, mhux biss il-waterpolo dejjem kien ghal qalbi. Kull opportunitá li kelli biex nilgħab jew inkun involut f’xi tip ta’ attivitá fiżika kont neħodha mal-ewwel. Hekk kien ġara fil-waterpolo, minħabba l-fatt li kelli lil ħija l-kbir li kien beda jittrenja mal-klabb tan-Neptunes. Inżilt darba nipprova u hemmhekk indunajt kemm il- waterpolo huwa sport tassew eċitanti u li fih ħafna gost.
Iddeskrivi l-esperjenza passata tiegħek ma’ Sliema ASC.
Meta smajt li l-klabb tas-Sliema kienu interessati fija, lura fl-2016, immedjatament kont mimli b’ferħ u eċitament. Sliema ASC dejjem kien klabb li rebaħ ħafna unuri fil-passat u li kien iġib bosta partitarji lejn il-pixxina biex jappoġġjaw lit-tim. Ovvjament ir-rebħ tal-kampjonat kien xi ħaġa li l-klabb tas-Sliema kien ilu ma jagħmel … fil-fatt meta ffirmajt diġá kienu ilhom madwar seba’ snin mingħajr tazza tas-sajf. Għalhekk, kien mill-ewwel ġurnata, l-għan tiegħi personali, kif ukoll tat-tim biex nirbħu tazza tal-kampjonat jew Knock-Out tas sajf. It-tim beda jkun aktar kompetittiv grazzi għax-xogħol impekkabli tal-kowċ Spanjol Beto Fernandez li nirringrazzjah għall-persuna li kien u x-xogħol siewi li għamel magħna. Peró, il-ħolma tiegħi u tat-tim li nirbħu, saret realtá fis-sajf li għadda fejn mhux talli rbahna tazza, iżda talli ksibna d-double fis-sajf. Fl-opinjoni tiegħi dan kien suċċess li kien ħaqqna tassew u konna ilna naħdmu għalih u hawnhekk nixtieq nirringrazzja lill-kowċis kollha tas-Sliema, specjalment lil Giannias Katrouzanakis, Maki, Edward Bonello u l-kumitat kollu li għen bis-sħiħ lit-team biex jikseb dan is-suċċess, kif ukoll il-plejers li saru familja oħra tiegħi. Il-klabb tas-Sliema dejjem se jkun għal qalbi u nawguralhom kull suċċess fil-futur.
Kif qed tħares lejn l-esperjenza ġdida tiegħek ma’ Sirens ASC?
Sirens ASC minn dejjem kien klabb kompetittiv u li jikkompeti mal-ewwel erba’ klabbs f’ Malta. Se nipprova nieħu l-esperjenza li ħadt mas-Sliema lura lejn il-klabb tas-Sirens u bil-mod li nittrenja u nilgħab, inkun ta’ eżempju għall-plejers żgħar li telgħin mas- Sirens. Sirens mhux klabb ġdid għalija, peressli kien lproprju dan il-klabb li emmen fija wara li tlaqt minn man-Neptunes ta’ 20 sena. Dejjem kelli relazzjoni tajba mal-klabb u naf żgur li jekk ningħaqdu bħala tim m’hemm xejn xi jżommna milli nkunu kompetittivi fis-snin li ġejjin. Nemmen li hemm plejers żgħażagħ li b’naqra eseperjenza jistgħu ikunu plejers importanti għat-tim fil-logħob li ġejjin. Il-faċilitajiet li għandu l-klabb huma żgur xi ħaġa importanti li jgħinu l-klabb jieġu l-frott massimu tal-potenzjal tal-plejers taghhom. Il-pixxina f’San Pawl dejjem tagħti opportunitá lill-klabb tkun flessibli fit- taħriġ tiegħu, kif ukoll il-gym ġdid fjamant li huwa aċċessibli għall-plejers. Nixtieq minn hawn nirringrazja bis-sħiħ lill-klabb tas-Sirens tal-interess u l-fiduċja li urww fija u nispera li dawn is-snin li ġejjin ikunu ta’ suċċess għalija u għall-klabb!
Kif tqis il-livell tal-waterpolo lokali fil-preżent?
Jekk tħares lejn ir-riżultati tat-tim nazzjonali Malti, żgur li l-livell qed jitjieb. Naħseb li hemm ħafna fatturi li qed jgħinu l-livell tal-plejers Maltin jikkompetu ma’ plejers barranin, li wieħed minnhom huwa li ħafna plejers qed jieħdu esperjenzi barra minn Malta, jilagħbu ma’ klabbs barranin. Biex titjieb, trid tilgħab kontra min hu aħjar minnek biex anke jekk titlef, għallinqas tkun qed titgħallem. Fattur ieħor għalfejn it-timijiet Maltin qed jgħollu l-livell tagħhom, huwa peressli t-timijiet kollha qed jiżdiedu fil-professjonaliżmu tagħhom, mhux biss fl-għażla tal-‘head coach’ tat tim u tal-plejers barranin, peró wkoll fil-kowċ li jieħu ħsieb il-‘conditioning’ tal-plejers, fejn jidħol għawm u xogħol fil-gym. Nemmen li jekk klabbs jibqgħu jilagħbu fl-Ewropa kontra timijiet minn kampjonati barranin, kif għamilna mas-Sliema, dejjem se jgħin biex il-livell tal-waterpolo Malti ikompli jikber.
Għaddi messaġġ finali lil min jixtieq jagħmel karriera ta’ suċċess fil-waterpolo.
Il-waterpolo huwa sport, bħal sports oħrajn, li jinvolvi ħafna sagrifiċċju u dedikazjoni. Xi ħadd li għadu jibda fl-isport, minn etá żgħira, inħeġġiġhom bis-sħiħ li jiffukaw fuq it- teknika tal-għawm. L-għawm huwa parti importanti mill-waterpolo u mingħajr livell tajjeb, dejjem se jkun difficli biex plejer jirnexxielu jagħmilha ma’ plejers oħrajn ta’ livell għoli. Fl-opnjoni tiegħi, dejjem huwa importanti li dejjem ikollok miri fil-viċin u dejjem tipġrova tilħaqhom fit-taħriġ ta’ kuljum. B’ħafna determinazzjoni, u xogħol kontinwu f’ kulma tagħmel, naħseb li dawn il-miri żgħar, iwassluk għall-objettivi finali li tkun tixtieq tilħaq fil-karriera tiegħek fil-waterpolo u mhux biss!
