Raġel ġie kkundannat sena u sitt xhur priġunerija, wara li nstab ħati li offra l-kannabis lill-pulizija pajżan qrib postijiet ta’ divertiment f’Paceville.
Fil-Qorti, il-Prosekuzzjoni mmexxija mill-Ispettur John Leigh Howard spjegat li l-imputat, Aseyr Ahmed Mustafa ġie arrestat waqt operazzjoni fl-istess żona.
Ingħad li fit-30 ta’ Novembru, il-Pulzija. nnutat li kien hemm diversi individwi li allegatament kienu qed jaħdmu flimkien biex ibigħu d-drogi.
L-Ispettur Howard spjega li l-operazzjoni żvelat network issuspettata li jinvolvi diversi individwi u li Mustafa kien arrestat wara li offra sustanza lill-pulizija pajżan.
Minn tfittxija illi saret fuq l-imputtat, irriżulta li dan kien qiegħed iġorr pakkett ta’ kannabis. Quddiem il-Maġistrat Jean Paul Grech, Mustafa wieġeb li huwa ħati tal-akkużi kollha miġjuba kontrih.
Minbarra s-sentenza ta’ 18 -il xahar ħabs, i-Maġistrat Grech ordna sabiex dan iħallas multa ta’ €500.
