Okamura Satoshi, Ġappuniż ta’ 31 sena, kien ikkundannat sentejn ħabs u mmultat €15,000 wara li ammetta li qatel diversi qtates f’Tas-Sliema.
Huwa tpoġġa taħt ordni ta’ trattament għal perjodu ta’ tliet snin filwaqt li kien ipprojbit milli jkollu jew jieħu ħsieb annimali għal 40 sena.
Is-sentenza ngħatat aktar kmieni mill-Maġistrat Nadine Sant Lia.
Il-Prosekuzzjoni f’dan il-każ tmexxiet mill-Ispettur Elliott Magro.
L-Avukati Adreana Zammit u Marion Camilleri dehru għal Satoshi.
“𝐒𝐞𝐧𝐭𝐞𝐧𝐳𝐚 S𝐭𝐨𝐫𝐢𝐤𝐚 𝐠ħ𝐚𝐥 𝐌𝐨ħ𝐪𝐫𝐢𝐣𝐚 𝐟𝐮𝐪 𝐥–𝐀𝐧𝐧𝐢𝐦𝐚𝐥𝐢”
B’reazzjoni fuq il-midja soċjali, il-Kummissarju għall-Ħarsien tal-Annimali Alison Bezzina qalet li l-Qorti lbieraħ tat l-aktar sentenza twila u qawwija li qatt ingħatat f’Malta għal moħqrija fuq l-annimali.
Minbarra l-piena ta’ sentejn priġunerija, il-multa ta’ €15,000 u l-projbizzjoni milli jżomm annimali għal 40 sena, il-Kummissarju qalet li wara li jservi s-sentenza, huwa se jkun qed jintbagħat lura pajjiżu.
Tenniet li għalkemm Satoshi għad għandu d-dritt li jappella, dan jibqa’ mument storiku – għax għall-ewwel darba ngħatat sentenza ta’ ħabs effettiva għal moħqrija lejn l-annimali.
“Huwa minnu wkoll li Satoshi rreżista l-arrest, u dan ġie kkunsidrat fis-sentenza, iżda jidher ċar li l-qalba ta’ din id-deċiżjoni kienet ibbażata fuq il-krudeltà u l-moħqrija mwettqa fuq annimali innoċenti.
“Din is-sentenza ta’ priġunerija mhix biss l-itwal, iżda wkoll l-ewwel waħda effettiva fl-istorja ta’ Malta għal moħqrija fuq l-annimali,” żiedet tgħid il-Kummissarju għall-Ħarsien tal-Annimali.
Min-naħa tagħha, is-Segretarju Parlamentari għall-Akwakultura, Sajd u d-Drittijiet tal-Annimali Alicia Bugeja Said iddeskriviet is-sentenza bħala pass ’il quddiem fejn jidħol il-ħarsien tal-annimali f’pajjiżna.