Niġerjan ta’ 40 sena li jgħix Ħaż-Żabbar ġie kkundannat sentejn u nofs ħabs wara li nstab ħati li gidem raġel ieħor f’imnieħru waqt ġlieda bejniethom fl-istess lokalità.
Quddiem il-Maġistrat Rachel Montebello, Ehis Imobhio kien mixli li fit-28 ta’ Diċembru 2021 ħebb għal raġel ieħor, li heddu u li kiser il-paċi pubblika b’għajjat u ġlied. Min-naħa tiegħu l-akkużat wieġeb li hu ħati għall-akkużi miġjuba kontrih.
Meta ġiet biex tagħti s-sentenza, il-Maġistrat Montebello kkunsidrat il-fatt li kemm l-imputat u kif ukoll il-vittma sofrew minn ġrieħi fil-ġlieda li kellhom bejniethom. Il-Qorti qieset ukoll il-fatt li l-vittma tilef biċċa żgħira minn imnieħru u kellu xufftejh imċarrta.
Il-Qorti kkunsidrat ukoll il-fatt li xhud li ra l-ġlieda qal li kien il-vittma li beda jattakka lil akkużat, hekk kif dan tah daqqtejn ta’ ponn.
Il-Maġistrat Montebello kkundannat lil Ehis Imobhio sentejn u nofs priġunerija. Fl-istess waqt inħarġet orn ngħata ukoll ordni ta’ trażżin kontra l-imputat u favur il-vittma għal perjodu ta’ tliet snin.
Il-Prosekuzzjoni tmexxiet mill-Ispetturi Darren Buhagiar u Gabriel Kitcher.
