Jason Joseph Vince Schembri ta’ 43 sena, imwieled il-Kanada, iżda fil-Qorti qal li m’għandux indirizz fiss, ġie kkundannat 19-il xahar ħabs sospiżi għal erba’ snin wara li nstab ħati li wettaq serqa minn residenza f’Marsalforn, li kkaġuna ħsara involontarja fuq il-karozza tal-eks sieħeba tiegħu, u li wettaq serqa ta’ basket minn ambulanza ta’ ħaddiem fil-qasam tas-saħħa li kien fih xi oġġetti.
Ir-residenza li fiha twettqet is-serqa hija tal-eks sieħba ta’ Schembri. L-imputat kien jaħdem bħala xufier tal-ambulanzi, iżda wara li nħarġu l-akkużi hu ġie sospiż minn xogħlu.
Fis-sentenza tiegħu l-Maġistrat Jean Paul Grech ordna li jħallas €2,050.61 lill-eks sieħba għall-ħsara li wettqa, kif ukoll €200 lir-raġel vittma tiegħu. Ir-raġel vittma kellu fil-baskett ċwievet, kartiera, charger, ġakketta, case tan-nuċċali u xi oġġetti oħra.
Is-sensiela ta’ każijiet li jvarjaw bejn Mejju u Lulju tal-2024 f’Għawdex u Malta. Il-każ beda fit-22 ta’ Ġunju meta dik li kienet is-sieħba tiegħu ċemplet lill-Għassa tar-Rabat Għawdex, u rrappurtat li kienet sabet €325 neqsin mill-kaxxa tad-dar tagħha f’Marsalforn, flimkien ma’ tliet ċwievet.
Il-vittma, li għandha sistema ta’ sorveljanza installata fid-dar, ipprovdiet lill-Pulizija filmat li juri raġel dieħel fir-residenza tagħha mingħajr permess. Hija identifikat lir-raġel bħala Schembri, li kienet taf u li kien żar id-dar tagħha qabel, iżda li qatt ma kien ingħata ċ-ċavetta tar-residenza. Fl-investigazzjonijiet il-Pulizija innotaw li ma kien hemm l-ebda sinjal ta’ sgass, u dan qajjem suspetti li l-imputat kellu ċavetta taqbel.
Imbagħad kien fis-26 ta’ Ġunju tal-istes sena meta l-eks sieħba għamlet rapport ieħor fil-konfront tal-imputat. Din id-darba allegat li hija kienet tat il-vettura tagħha lill-imputat b’kuntratt verbali biex jixtriha għal €5,000. Allegat li l-imputat ħallas biss €1,500 u baqa’ ma rritornax il-karozza minkejja li qal li ma kellux aktar interess li jixtriha.
Meta x-xahar ta’ wara l-istess vettura kienet ingħata lura lill-vittma, instabet bi ħsarat li qabel ma kinux jeżistu, kif ukoll bi pjanċi barranin. Il-Pulizija mill-investigazzjonijiet sabu wkoll li l-vettura kienet intużat fuq licenzja skaduta u li fuqha kienu ttellgħu tliet multi totali ta’ €320 waqt li kienet fl-użu tal-imputat.
Waqt li kienu għadhom għaddejjin l-investigazzjonijiet, xufier tal-ambulanza għamel rapport fejn allega li kien hemm basket li nsteraq mill-ambulanza li kien ipparkjat quddiem id-Dipartiment tal-Outpatients fl-Isptar Mater Dei.
Minn filmati tas-sigurtà, ħareġ li fil-ġranet tal-allegat serqa kienet waqfet karozza ħdejn l-ambulanza simili ħafna għal dik li kellha l-eks sieħba tiegħu. Fl-istess filmati deher raġel b’eħja twila jieħu l-basket mill-ambulanza.
Wara li ġew miflija dawn il-filmati Schembri ġie ddentifkat bħala l-persuna li allegatament kien serqa il-basket.
L-Ispettur Keith Xerri spjega fil-Qorti li t-tfittxija għall-imputat kompliet għal ġimgħat minħabba li ma kellux indirizz fiss. Fit-2 ta’ Lulju ġie awtorizzat mandat ta’ arrest u fit-12 ta’ Lulju Schembri deher il-Għassa tal-Ajruport biex jagħmel rapport mhux relatat, fejn immedjatament ġie arrestat bħala persuna mfittxija.
Fi tfittxija li saret fil-vettura li kien qiegħed isuq, il-Pulizija sabu vest ta’ ambulanzi, logbook, polza tal-assigurazzjoni tal-vettura tal-eks sieħba, ID tag tal-isptar bl-isem tal-akkużat, liċenzja tas-sewqan Kanadiża skaduta, credit card misruqa u tliet settijiet ta’ ċwievet.
Waħda miċ-ċwievet li instab kienet taqbel mas-serratura tar-residenza tal-eks sieħbha. Meta l-imputat ġie mitkellem mill-Pulizija hu ċaħad li xi darba kellu ċavetta tar-residenza tal-eks sieħba tiegħu.
Fir-rigward tas-serqa tal-basket tal-ambulanza, Schembri ammetta li kien hu l-persuna fil-filmat iżda sostna li l-basket kien tiegħu. Il-Pulizija qalu li minkejja li instab xi basket fil-vettura tal-kiri, dan ma kienx tal-vittma skont verifika magħmula ma’ l-istess vittma.
Fl-istqarrija tiegħu lill-Pulizija, Schembri ammetta li ħallas parti mill-prezz tal-karozza u qal li ma riedx jirritornaha lil mara qabel ma jingħata lura s-somma mħallsa. Dwar id-dħul fir-residenza tagħha, huwa ddikjara li “ma jiftakarx” x’għamel dak il-jum iżda ammetta li ġieli daħal “inkiss inkiss” biex ma jqajjimx lill-vittma.
Min-naħa tagħha l-eks sieħba tal-imputat meta kienet qiegħda tixhed qalet li meta marret tiġbor il-vettura sabitha f’kundizzjoni ħażina ħafna u bi ħsarat li qabel qatt ma eżistew: tieqa miksura, tyres mibdulin u ċatti, hubcaps neqsin, il-vettura bla ilma, bla żejt u bla petrol, bonnet li ma jingħalaqx, dwal ta’ wara li ma jaħdmux, ħsarat fil-bieba, fil-bumper u grif estensiv fuq in-naħa tax-xellug.
Il-bumper ta’ quddiem kien mibdul u fuqu kien hemm tape iswed li hi qatt ma waħħlet. Barra minn hekk, il-pjanċi oriġinali kienu tneħħew u nstabu oħrajn barranin minflok.
Fil-vettura sabet ukoll li kienu neqsin xi oġġetti personali, fosthom tambur li jiswa €100, ħwejjeġ u żraben u qalet li minkejja l-ħsarat kollha kienet lesta li tirtira l-akkuża tal-misapproprjazzjoni, ladarba l-vettura ġiet ritornata.
L-eks sieħha xehdet ukoll dwar is-serqa mir-residenza tagħha. Spjegat quddiem il-Maġistrat li bdiet tinnota ammonti żgħar ta’ flus neqsin fl-aħħar ġimgħat, u dakinhar tat rapport iddeċidiet tixgħel kamera tas-sigurtà li normalment tkun mixgħula biss meta tkun barra minn Malta. Il-kamera turi l-bieb ewlieni u l-mejda tal-ikel u tagħti live feed.
F’ħin minnhom hi rċeviet notifika u fil-filmat deher l-imputat jidħol fl-appartament tagħha permezz ta’ ċavetta. Il-vittma insistiet li qatt ma kienet tatu ċ-ċavetta u li fil-filmat hu jidher idur lejn l-inħawi fejn iżżomm il-flus.
Għalkemm il-kamera ma tarax direttament il-gradenza, l-eks sieħha qalet li l-imputat kien jaf li hemm kienet iżżomm xi ammont. Il-kamera waqfet tirrekordja minħabba s-settings tagħha, iżda l-ħin tas-serqa kien madwar 5.15pm. Wara sabet €325 neqsin, ammont li kienet żammet fil-kexxun. Qalet ukoll li fil-ġimgħat ta’ qabel kienet sabet flus neqsin iżda ma kinitx irrappurtat.
Hija ddeskriviet kif wara s-serqa sabet ukoll neqsin sett ta’ ċwievet abbinati mas-serratura tal-appartament. Qalet li hi kienet tafda ċavetta lil xi ħbieb iżda qatt ma tat waħda lil Schembri, u lanqas qatt ma awtorizzatu jidħol waħdu. Hija qalet li jista’ jkun seraq iċ-ċavetta jew għamel kopja minn waħda li kien sab.
Ix-xhud spjegat li hi u l-imputat kienu ħbieb, iżda f’ċertu punt anke l-ħbiberija kienet waħda intima. Qalet li fil-passat l-imputat kien ra fejn iżżomm il-flus u fil-fatt meta daħal fir-residenza hu kien mar mill-ewwel f’dak il-post.
Meta ġiet mistoqsija jekk l-imputat kienx awtorizzat juża xi ċavetta li kienet taħt it-tapit, Hi ċaħdet dan u spjegat li meta kien imur għandha kienet dejjem tidħol miegħu u tiftaħlu hi. Fil-każ tas-serqa, qalet li l-imputat seta’ daħal b’ċavetta li seraq minn ġewwa r-residenza, peress li dik taħt it-tapit kienet għadha hemm.
Dwar il-vettura, ikkonfermat li meta tat il-karozza lil Schembri f’Mejju 2024 kienet b’kundizzjoni tajba ħlief għal ftit grif u skorfina żgħira. Qalet li rat il-vettura fi żmien li kien jużaha l-imputat u anke rikbet fiha darba jew tnejn fl-ewwel ġimagħtejn, iżda dak iż-żmien ma kellhiex il-ħsarat estensivi li sabet meta ġiet ritornata.
Hija qalet li l-akkużat kien abbanduna l-vettura u ma setgħetx tivverifika l-kundizzjoni tagħha sa meta l-Pulizija sabuha fil-Mistra. Il-vittma, ir-raġel vittma li jaħdem ma’ tal-ambulanzi xehed li hu jaħdem fid-Dipartiment tal-Outpatients fl-Isptar Mater Dei bħala ambulance porter, fejn il-kompitu tiegħu hu li jakkumpanja l-pazjenti lejn u mill-Isptar Mater Dei.
Min-naħa tiegħu s-sewwieqa tal-ambulanza spjega quddiem il-Qorti li fid-29 ta’ Ġunju 2024, għall-ħabta 12:15pm innota li l-basket tiegħu ta’ lewn griż li kien fin-nofs tas-seat ta’ quddiem ġewwa l-ambulanza kien nieqes. Fil-ħin tas-serqa, l ambulanza kienet ipparkkjata quddiem l-entratura tad-Dipartiment tal Outpatients fl-Isptar Mater Dei. Meta ġie mistoqsi mill-Qorti jekk hu jkunx assenjat mal-istess ambulanza meta huwa jkun xogħol, ix-xhud ikkonferma li fil-ġurnata tas-serqa, kien qed juża l-istess ambulanza.
Ix-xhud spjega wkoll li kienu pparkkjaw l ambulanza għall-ħabta ta’ 12:00pm u nduna li l-basket kien nieqes xi siegħa wara. Ix-xhud qal li fil-basket personali tiegħu, kellu diversi oġġetti, fosthom: iċ ċwievet, inkluż dawk tad-dar tiegħu, il-kartiera li fiha kien hemm il-kartà tal-identità Maltija kif ukoll dik tal-pajjiż oriġinali tiegħu, credit cards, case tan-nuċċali, estensjoni manjetika għan-nuċċali tax-xemx, charger, ġakketta sewda, sunscreen, nail clippers u umbrella.
Ix-xhud ikkonferma li l-ambulanza ma tissakkarx u li normalment, hu u s sewwieq biss ikollhom aċċess għaliha, u l-pazjenti jiddaħħlu minn wara. Jgħid ukoll li malli nduna li l-basket insteraq, ix-xhud mar jipprova jagħmel rapport ġewwa l-għassa li tinsab ġewwa l-Isptar Mater Dei.
Però huwa ngħata struzzjonijiet sabiex jagħmel rapport ġewwa l-Għassa tal-Pulizija ta’ Tas-Sliema. Ix-xhud ikkonkluda li l-kollegi tiegħu identifikaw lill-persuna li kien ħadlu l basket bħala Jason Schembri. Dan kien jaħdem l-isptar fil-passat. Żied jgħid li Dusan ra l-filmat u ra lill-akkużat jipparkja quddiem l-ambulanza, jiftaħ il-bieba u jieħu l-basket.
Il-Qorti qalet fis-sentenza tagħha li temmen li jkun idoneju li l-imputat jingħata sentenza sospiża għal żewġ raġunijiet, li għalkemm l-akkużat mhuwiex a first time offender, l-aħħar kundanna li kellu tmur lura għal 5 ta’ Novembru 2001. Qalet li tqis li għandha tagħti ċans ieħor lill-akkużat biex jirriforma ruħu.
Aktar importanti minn hekk il Qorti għandha interess ukoll li l-akkużat iħallas lill-vittmi tiegħu mill-aktar fis possibbli, ħaġa li ma tkunx possibbli li ssir jekk huwa jingħata piena ta’ ħabs effettiv. Il-Qorti għaldaqstant ikkundannat lill-imputat 19-il xahar ħabs sospiżi għal żmien erba’ snin.
Il Qorti ordnat ukoll lill-ħati Jason Joseph Vince Schembri sabiex iħallas lill-vittmi l-ammonti kollha. Finalment il-Qorti wara li rat l-artikolu 383 tal-Kapitolu 9 tal-Liġijiet ta’ Malta sabiex tipprovdi għas-sigurta tal-vitmti kif ukoll sabiex jinżamm il-bon ordni pubbliku qiegħda torbot lill-ħati Jason Joseph Vince Schembri taħt obbligazzjoni tiegħu nnifsu għal perjodu ta’ sena u dan taħt penali €1,000.
