Żagħżugħ ta’ 21 sena mill-Eritrea ġie kkundannat disa’ xhur ħabs sospiżi għal sena wara li ammetta li fid-19 ta’ Settembru tas-sena l-oħra, wettaq ħsara fuq lift li jinsab fil-Marsa-Ħamrun bypass.
Il-Prosekuzzjoni qalet li l-ħsara li wettaq Adhanom Gebrit, li huwa residenti l-Marsa, tammonta għal €840. Qal ukoll li fir-rigward tal-piena, il-Qorti trid tieħu l-kunsiderazzjoni li l-ħsarat saru fuq proprjetà pubblika.
L-Avukat Difensur Mark Mifsud Cutajar qal li l-akkużat ħa mill-bidu r-responsabilità fuq spallejh rigward dak kollu li kien għamel. Spjega wkoll li ż-żagħżugħ kien lest li jagħmel tajjeb għal ħsara li wettaq.
Il-Qorti preseduta mill-Maġistrat Elaine Mercieca Rizzo filwaqt li kkundannatu sentenza sospiża, immultatu s-somma ta’ €840, li jistgħu jitħallsu f’perjodu ta’ 100 ewro fix-xahar.
Il-Prosekuzzjoni tmexxiet mill-Ispettur Ian Vella.
