Jason Mallia ta’ 52 sena ngħata sentenza ta’ ħabs sospiża wara li ammetta li kien qed ġorr arma fil-pubbliku mingħajr liċenzja u li kkawża raġel ieħor li jbati bi tħassib li setgħet kun użata vjolenza kontrih.
L-Ispettur Kurt Farrugia li mexxa l-Prosekuzzjoni qal fil-Qorti li nhar il-Ġimgħa li għaddiet, il-Pulizija kienu rċivew rapport dwar raġel li allegatament ġie attakkat.
Meta l-Pulizija waslu fuq il-post sabu lil James Manfrè li uriehom il-garaxx f’Ħal Tarxiex fejn seħħ l-argument. Il-Pulizija kellhom jisgassaw il-bieb biex daħlu fih fejn sabu lil Jason Mallia bid-demm ħieraġ.
James Manfrè kien tressaq il-Qorti nhar is-Sibt li għadda akkużat b’dan il-każ. Hu kien tressaq hekk kif Mallia qal lill-investigaturi li kien Manfrè li attakkah.
Iżda l-avukat ta’ Manfrè waqt li kien qiegħed jidher għal klijent tiegħu l-Qorti nhar is-Sibt li għadda allega li Mallia kien ipponta arma tan-nar lejn il-klijent tiegħu.
Kien għalhekk li l-Pulizija komplew jinvestigaw u nhar it-Tnejn li għadda arrestaw lil Mallia.
Il-Prosekuzzjoni qalet li Mallia kien ipponta arma tan-nar lejn persuna u din l-arma li allegatament intużat fl-argument ma nstabitx mill-ewwel. Aktar tard fi tfittxija li saret din l-arma nstabet u rriżulta li kienet arma li tista’ tispata biss ‘in bjank’.
Mallia ammetta l-akkużi kontrih.
Il-Qorti twissiet bih għall-konsegwenzi ta’ dik l-ammissioni ta’ ħtija bl-akkużat jikkonferma l-ammissjoni tiegħu. Il-qorti sabet lil Mallia ħati u kienet qablet li tingħata sentenza ta’ sena ħabs, sospiża għal sentejn. Il-Qorti ordnat ordni ta’ trażżin ta’ tliet snin favur Manfrè.
Mallia kien ukoll ipprojbiet milli jikseb liċenzja tal-armi għal tliet snin. Il-Maġistrat Jean Paul Grech ppresieda l-każ. L-Ispettur tal-Pulizija Kurt Farrugia mexxa l-prosekuzzjoni. L-Avukat Silvan Pulis deher għall-akkużat.