L-ex president tal-Fifa, Sepp Blatter, ċaħad li approva ħlasijiet illegali lil-leġġenda tal-football Franċiż Michel Platini, u qal lill-qorti Svizzera nhar il-Ħamis li trasferiment ta’ flus segwa “ftehim verbali” bejn iż-żewġ persuni.
Il-prosekuturi Żvizzeri akkużaw liż-żewġt irġiel, darba fost il-figuri l-aktar b’saħħithom fil-football mondjali, li rranġaw illegalment il-ħlas ta’ żewġ miljun frank Żvizzeru fl-2011. Blatter u Platini it-tnejn ċaħdu l-akkużi.
Blatter ta xhieda lill-Qorti Kriminali Federali f’Bellinzona wara li nhar l-Erbgħa ġie skużat għal raġunijiet ta’ saħħa. L-anzjan ta’ 86 sena qal li kien talab lil Platini biex ikun il-konsulent tiegħu wara li l-uffiċjal Svizzeru kien elett president tal-Fifa għall-ewwel darba fl-1998.
Platini talab li jitħallas miljun frank Żvizzeru fis-sena iżda Blatter qal lill-Franċiż li l-FIFA ma setgħetx taffordja salarju bħal dan.
Minflok qablu li Platini, wieħed mill-aqwa players tal-ġenerazzjoni tiegħu, jitħallas 300,000 frank Svizzeru fis-sena, bil-flus pendenti jitħallsu aktar tard.
“Kont naf meta bdejna ma’ Michel Platini li dak ma kienx it-total, u konna se nħarsu lejh aktar tard,” qal Blatter b’referenza għas-salarju miftiehem ta’ 300,000 frank Svizzeru għall-impjieg ta’ konsulent tekniku.
Issiġillat bi ftehim verbali, Blatter qal li l-arranġament kien hekk imsejjaħ “gentleman’s agreement”.
“Kien ftehim bejn żewġ sportivi,” qal Blatter. “Ma sibt xejn ħażin f’hekk.”
Platini iffirma kuntratt bil-miktub mal-FIFA fl-1999, iżda speċifika biss salarju ta’ 300,000 frank Żvizzeru, mingħajr ma ssemmew il-ħlasijiet żejda li allegatament kienu saru.
