Il-midfielder ta’ Barcelona, Sergi Roberto, rrifjuta offerti minn numru ta’ clubs tal-MLS.
Il-kuntratt tal-player ta’ 30 sena fil-Camp Nou għandu jiskadi fl-aħħar ta’ Ġunju, u kien hemm għadd ta’ spekulazzjonijiet dwar il-futur tiegħu fl-aħħar ġimgħat.
Il-coach ta’ Barcelona Xavi riċentement esprima x-xewqa li jżomm lill-internazzjonali ta’ Spanja, iżda t-taħditiet dwar il-kuntratt allegatament twaqqfu, u dan wassal għal suġġerimenti ta’ interess minn Arsenal u Manchester City.
Huwa mifhum li numru ta’ clubs tal-MLS kienu wkoll f’kuntatt mar-rappreżentanti tal-midfielder, iżda Roberto għamilha ċara li mhux qed ifittex li jmur jilgħab fl-Amerika.
Minflok, l-Ispanjol huwa determinat li jiffirma ftehim ġdid fil-Camp Nou iżda se jfittex li jingħaqad ma’ club ieħor Ewropew jekk ma jkunx jista’ jilħaq ftehim mal-ġganti Katalani.
Roberto għamel biss 12-il dehra għat-team immexxi minn Xavi matul l-istaġun 2021-22, skorja żewġ goals u pprovda assist wieħed, wara li ilu nieqes mill-azzjoni mill-aħħar ta’ Ottubru minħabba injury.