Serie A: Delikata għal Napoli, diffiċli għal Roma?

Meta tintlagħab l-10 ġurnata tas-Serie A, l-attenzjoni prinċipali tkun mixħuta fuq iż-żewġ timi­jiet li qed jokkupaw l-ew­wel post – Napoli u Roma.

Filwaqt li Napoli għandhom partita delikata kontra t-team rivelazzjoni, Como, Roma għandhom partita dif­fiċli meta jmorru jilagħbu għand Milan.

Napoli v Como – Napoli jilqgħu lil Como f’dik li hija meqjusa bħala waħda delikata.

Dan minħabba li Como, immexxija mill-coach Cesc Fabregas, jinsabu fil-ħames post u jekk joħorġu rebbieħa fi Stadio Diego Maradona, huma jitilgħu żewġ punti biss taħt l-istess Nap­litani.

Dawn tal-aħħar mhux dejjem qed juru l-konsistenza hekk kif fl-aħħar ħames partiti sofrew żewġ telfiet.

Bla dubju, huma jridu jkunu fl-aqwa forma possibbli kontra team li qed jissorprendi minħabba li ma għandu l-ebda pressjoni.

Napoli ma jistgħux jinkludu lill-imweġġgħin Cy­ril Ngong, Noa Lang, Alex Meret, Kevin De Bruyne, Stanislav Lobotka, Jesper Lindstroem u Romelu Lu­kaku.

Milan v Roma – Dan il-konfront huwa l-aqwa wieħed ta’ tmiem il-ġimgħa.

Hekk kif Roma qed jaqsmu l-ewwel post ma’ Napoli, jidher li l-coach, Giam­piero Gasperini, qed jirnexxielu joħloq bilanċ kbir fl-is­kwadra u qed inissel serenitá fost il-players.

Min-naħa tal-Milanisti, dawn ġejjin minn żewġ draws fejn fil-veritá setgħu rebħuhom … bl-aktar player li qed jibbrilla jkun l-ixjeħ wieħed, Luka Modric.

Ir-Rossoneri  ma jis­tgħux jinkludu lil Santiago Gimenez, Pervis Estupinan, Sa­muel Chukwueze, Christian Pulisic, Adrien Rabiot u Ardon Jashari minħabba li qed jirkupraw minn injury.

Roma se jkollhom jgħaddu mingħajr Marash Kumbulla, Angelino u Edoardo Bove, minħabba l-istess ra­ġuni.

Verona v Inter – Jekk iridu jżommu l-pass ma’ ta’  fuq, Inter iridu bilfors jik­sbu t-tliet punti meta jmorru jilagħbu għand Verona.

It-team immexxi minn Christian Chi­vu qed ikun inkosistenti fil-logħob tie­għu hekk kif diġá sofra tliet telfiet.

Cremonese v Juventus – Juventus imorru għand Cremonese b’moral għoli wara li nhar l-Erbgħa għelbu lil Udinese bl-iskor ta’ 3-1 hekk kif din kienet l-ewwel rebħa għall-Bianconeri mit-13 ta’ Settembru fil-kompetizzjonijiet kollha, bil-kon­segwenza li keċċew lill-coach, Igor Tudor.

Proprju din se tkun l-ewwel partita taħt il-coach il-ġdid, Luciano Spalletti (ara paġna 19).

Huma ma jistgħux jinkludu lill-imweġġgħin Carlo Pinsoglio, Ti­mo­thy Weah, Gleison Bremer, u Arka­diusz Milik.