Fis-Serie A, Milan jistgħu jsaħħu posthom fil- quċċata tal-klassifika meta jospitaw lil Empoli filwaqt li Inter, li jinsabu fit-tieni pożizzjoni b’partita inqas, għandhom partita delikata meta jmorru jilagħbu għand Torino. Min-naħa l-oħra, Napoli jaffrontaw lil Verona barra minn darhom.
Milan v Empoli – Milan jibdew favoriti li jiksbu t-tliet punti biex isaħħu l-quċċata meta jilqgħu lil Empoli.
Huma jinżlu għal dan il- konfront b’moral għoli hekk kif ġejjin minn rebħa prezzjuża ta’ 1-0 barra minn darhom kontra Napoli bil-goal jasal minn Olivier Giroud.
Empoli jinsabu komdi f’nofs il-klassifika u għalhekk m’għandhom l-ebda pressjoni għal din il-partita. Huma ma jistgħux jinkludu lis-sospiż Ardian Ismaili filwaqt li Riccardo Marchizza u Nicolas Haas qed jirkupraw minn injury.
Min-naħa tiegħu, il-coach tar-Rossoneri, Stefano Pioli, se jkollu jgħaddi mingħajr l-imweġġgħin, Olivier Giroud, Tiemoue Bakayoko, Alessio Romagnoli filwaqt li Zlatan Ibrahimovic għadu dubjuż.
Inter v Torino – Inter imorru għand Torino fejn jimmiraw għal rebħa biex jibqgħu fit-taqtiegħa għar- rebħ tat-titlu … l-aktar meta jridu jirkupraw partita li tagħtihom motivazzjoni kbira għalkemm fil-veritá mhumiex garantiti mit-tliet punti għax iridu jaħdmu għaliha.
Torino jinsabu xxamplati f’nofs il-klassifika ‘l bogħod mill-periklu tar-relegazzjoni.
Huma ma jistgħux jinkludu lil Pietro Pellegri li hu pożittiv għal Covid-19 filwaqt li Milinkovic Savic, Denis Praet u Mohamed Fares huma mweġġgħin.
Inter, li ġejjin mill-eliminazzjoni mill-UEFA Champions League għas-spejjeż ta’ Liverpool, għandhom barra lil Stefan De Vrij minħabba injury fil-pexxul.
Verona v Napoli – Napoli jittamaw li jirritornaw għar- rebħ meta jmorru fir-reġjun ta’ Veneto sabiex jaffrontaw lil Verona.
Il-coach Naplitan, Luciano Spalletti, irid jagħraf kif jirriorganizza lill-players tiegħu wara t-telfa diżappuntanti f’darhom ta’ 1-0 kontra Milan. Għaldaqstant xejn għajr minn rebħa ma tissodisfa l-kriterji tagħhom.
Napoli għadhom ma jistgħux jużaw is-servizzi ta’ Kevin Malcuit, Axel Tuanzebe u Hirving Lozano minħabba li qed jirkupraw minn injury.
Sampdoria v Juventus – Juventus imorru għand Sampdoria fejn jimmiraw li jżommu s-sensiela pożittiva li tellgħethom fir-raba’ post wara bidu pjuttost negattiva.
Min-naħa ta’ Sampdoria, dawn għandhom bżonn il-punti minħabba li jinsabu maqbudin fin-naħa t’isfel tal-klassifika.
Il-Bianconeri għandhom lista twila ta’ players li mhux se jkunu disponibbli li jinkludu lil Weston Mc Kennie, Paulo Dybala, Giorgio Chiellini, Leonardo Bonucci, Denis Zakaria, Mattia de Sciglio u Alex Sandro.
