Meta jibda jintlagħab it-tieni round tas-Serie A, il-leaders Napoli jilqgħu lil Roma f’dik li hija meqjusa bħala partita delikata u diffiċli filwaqt li Milan, li jinsabu fit-tieni post, iridu jirritornaw għar-rebħ meta jospitaw lil Sassuolo.
Napoli v Roma– Fl-aqwa partita ta’ tmiem il-ġimgħa Napoli jilagħbu kontra Roma fejn jimmiraw li jkomplu jkabbru r-rekord ta’ 16-il partita konsekuttiva mingħajr telfa f’darhom.
Barra minn hekk, huma jimmiraw ukoll li jżommu t-12-il punt vantaġġ fil-quċċata tal-klassifika.
Min-naħa ta’ Roma, l-objettiv tagħhom huwa li jispiċċaw mal-ewwel erbgħa u xejn għajr minn rebħa ma tissodisfa l-kriterji tagħhom.
Għal din il-logħba, Napoli se jkollhom jgħaddu mingħajr is-servizzi tal-imweġġgħin Juan Jesus u Kvicha Kvaratshkelia filwaqt li Roma se jkollhom nieqes lil Georgino Wynaldum għall- istess raġuni.
Milan v Sassuolo– Milan jlqgħu lil Sassuolo u hija ħaġa imperattiva li jirritornaw għar-rebħ hekk kif ġejjin minn żewġ draws u telfa biex prattikament inqatgħu mill-kuntatt mal-leaders tal-klassifika.
Min-naħa tagħhom, Sassuolo ġejjin minn erba’ telfiet u draw u għaldaqstant mhux se jċedu pulzier għall-fatt li jinsabu fil-periklu tar-relegazzjoni.
Milan se jkunu mingħajr l-imweġġħin Zlatan Ibrahimovic, Fode Ballo, Mike Maignan u Alessandro Florenzi.
Lazio v Fiorentina – Lazio huma s-sorpriża ta’ dan l-istaġun li ġew minn imkien biex qed jaqsmu t-tielet post tal-klassifika flimkien ma’ Inter.
Huma se jilagħbu f’konfront diffiċli kontra Fiorentina iżda mhux impossibbli.
Lazio għandhom lil Ciro Immobile u Mario Gila li qed jirkupraw minn injury.
Cremonese v Inter– Trawmatizzati mit-telfa f’darhom bl-iskor ta’ 1-0 kontra Empoli, Inter imorru jilagħbu għand Cremonese b’moral baxx immens minħabba li fallew tliet punti mill-aktar importanti.
Iżda issa jridu jirriorganizzaw u jikkonċentraw fuq Cremonese minħabba li ma jistgħux iwaqqgħu aktar punti fil-pożizzjoni delikata li jinsabu fiha.
Huma se jkunu mingħajr l-imweġġgħin Samir Handanovic u Marcelo Brozovic filwaqt li Milan Skriniar huwa sospiż.
RIŻULTATI U PROGRAMM
Il-bieraħ
Bologna v Spezia 2-0
Lecce v Salernitana 1-2
Illum
Empoli v Torino 3.00
Cremonese v Inter 6.00
Atalanta v Sampdoria 8.45
Għada
Milan v Sassuolo 12.30
Juventus v Monza 3.00
Lazio v Fiorentina 6.00
Napoli v Roma 8.45
It-Tnejn
Udinese v Verona 8.45
