Meta l-bieraħ beda jintlagħab il-programm tal-Għid il-Kbir tal-Kampjonat Taljan, Inter fallew żewġ punti mill-aktar importanti meta marru għand Salernitana u setgħu biss jispiċċaw fi draw ta’ 1-1.
Minkejja li telgħu fit-tielet post, in-Nerazzurri jistgħu jinqabżu minn Milan u Roma minħabba li lagħbu partita aktar.
Huma skorjaw kmieni fil-logħba, wara biss sitt minuti meta Romelu Lukaku xeħet għan-nofs fejn Joaquin Correa naqas li jikkonnettja iżda Robin Gosens kien fil-post it-tajjeb u b’first-timer xeħet fis-saqaf tax-xibka.
Madankollu fid-90 minuta, Salernitana kisbu d-draw meta l-cross-shot ta’ Antonio Candreva qarraq b’kulħadd u baqa’ dieħel fix-xibka.