Wara li tard il-Ġimgħa fil-għaxija Lazio marru għand Napoli u ħarġu rebbieħa bl-iskor ta’ 1-0 biex qabżu waħedhom fit-tieni post, Inter u Milan jimmiraw li jkunu huma li jerġgħu jaqbżu fit-tieni post hekk kif iridu jirkupraw partita kontra kontra Lecce u Fiorentina rispettivament.
Inter v Lecce – Fuq il-karta Inter jibdew favoriti li jiksbu t-tliet punti meta jospitaw lil Lecce.
In-Nerazzurri jridu jpattu għad-diżappunt tat-telfa ta’ 1-0 kontra Bologna minħabba li huwa ġew milħuqa minn Milan u għaldaqstant ma jistgħux ifallu.
Huma se jilagħbu kontra team li jinsab 10 punti fuq iż-żona l-ħamra. Iżda Lecce huma team enigma u inkonsistenti.
Filwaqt li f’darhom sfaw megħluba minn Sassuolo 1-0, barra minn darhom għelbu lil Atalanta 2-1.
Lecce għandhom barra lil Kastriot Dermaku u Marin Pongracic filwaqt li Inter ma jistgħux jinkludu lil Federico Di Marco, Joaquin Correa u Milan Skriniar minħabba li kollha qed jirkupraw minn injury.
Fiorentina v Milan – Milan għandhom impenn delikat meta jmorru jilagħbu għand Fiorentina.
Jidher li r-Rossoneri ġejjin f’tagħhom wara li kienu maqbudin fi kriżi
Fl-aħħar konfront tagħhom huma għelbu lil Atalanta bl-iskor ta’ 2-0 biex laħqu lill-”kuġini” fit-tieni post tal-klassifika.
Fiorentina, li jinsabu fit-12-il post, jinżlu għal dan il-konfront b’moral għoli hekk kif ġejjin minn rebħa ta’ 3-0 fuq Verona li rreġistraw barra minn darhom.
Il-Viola għandhom l-iskwadra kollha għad-dispożizzjoni tagħhom filwaqt li Davide Calabria u Ismael Bennacer jinsabu mweġġgħin għal Milan u Zlatan Ibrahimovic mistenni li jkun fil-formazzjoni inizjali.
Roma v Juventus – Bla dubju, dan huwa l-aqwa konfront ta’ tmiem il-ġimgħa.
Filwaqt li Roma għadhom fl-isfida għall-kwalifikazzjoni tal-UEFA Champions League, Juventus jinsabu fis-seba’ post tal-klassifika iżda b’distakk ta’ 10 punti miż-żona Ewropea.
Dan wara li tnaqqsulhom 15-il punt minħabba rregolaritajiet fil-kotba finanzjarji tagħhom. Il-każ jinsab quddiem il-Bord tal-Appelli u jekk dan jintlaqa’, il-Bianconeri jsibu ruħhom fit-tieni post tal-klassifika.
Apparti kollox, huma ġejjin minn rebħa ta’ 4-2 fuq Torino fid-Derby delle Mole. Minbarra din ir-rebħa, il-punt pożittiv kien ir-ritorn ta’ Paul Pogba hekk kif qatt ma lagħab mindu ngħaqad magħhom fis- sajf mingħand Manchester United minħabba injury fit-tul.
Roma ġejjin minn telfa xejn mistennija ta’ 2-1 kontra Cremonese bil-coach, Jose Mourinho, jintwera l-karta l-ħamra wara argument jaħraq mar-raba’ uffiċjal. Huwa ġie sospiż żewġ logħbiet u għaldaqstant ma jistax imexxi lit-team minn fuq il-bank.
Juventus se jkollhom jgħaddu mingħajr Fabio Miretti, Arkadiusz Milik u Kaio Jorge filwaqt li Ebrima Darboe se jkun barra għal Roma għax imweġġgħin.
