Mingħajr l-ebda dubju, l-aktar partita tas-Serie A li d-dilettanti tal-football ikunu qed jistennew bil-ħerqa hija dik bejn Inter u Juventus liema partita hija meqjusa bħala d-Derby tal-Italja minħabba r-rivalitá ħarxa li nibtet bejn dawn iż-żewġ clubs.
Inter v Juventus – Dan huwa konfront klassiku fejn iċ-champions Inter jospitaw lil Juventus.
In-Nerazzurri jinsabu fit-tieni post segwiti mill-Bianconeri meta punt wieħed biss qed jifred liż-żewġ timijiet.
Inter jimmiraw li joħorġu bit-tliet punti biex fl-istess waqt jagħtu l-ewwel telfa lil Juventus li huma l-uniku team li għadu ma ġiex megħlub fil-kampjonat Taljan.
Matul din il-ġimgħa, iż-żewġ timijiet lagħbu fil-Fażi tal-Kampjonat tal-UEFA Champions League fejn kellhom riżultati mħallta.
Filwaqt li barra minn darhom Inter għelbu lil Young Boys tal-Isvizzera bl-iskor ta’ 1-0, f’darhom Juventus sfaw megħluba minn Stuttgart tal-Ġermanja bl-istess skor.
Din il-partita se tkun ukoll dwell bejn iż-żewġ attakkanti, Lautaro Martinez ta’ Inter u Dusan Vlahovic ta’ Juventus.
Iż-żewġ timijiet iltaqgħu 182 darba fil-kampjonat bir- rekord huwa favur Juventus b’87 rebħa kontra d-49 ta’ Inter bis-46 l-oħra jintemmu fi draws.
Inter se jkollhom jgħaddu mingħajr Francesco Acerbi, Hakan Calhanoglu, Kristjan Asllani, Piotr Zielinski u lil Tajon Buchanan filwaqt li Juventus ma jistgħux jinkludu lil Weston McKennie, Teun Koopmeiners, Nicolas Gonzalez, Bremer u Arkadiusz Milik, minħabba li kollha qed jikupraw minn injury.
Napoli v Lecce– Il-leaders Napoli jilqgħu lil Lecce fejn jibdew favoriti li joħorġu rebbieħa u għaldaqstant iżommu posthom fil-quċċata.
Napoli se jkollhom jgħaddu mingħajr is-servizzi ta’ Stanislav Lobotka u Alex Meret filwaqt li Lecce għandhom barra lis-sospiż Antonino Gallo u Luis Hasa, Filip Marchwinski, Kevin Bonifazi u Medon Berisha.
