Meta f’dan tmiem il-ġimgħa, tintlagħab it-tieni ġurnata tal-Kampjonat Taljan, it-timijiet il-kbar jibdew favoriti li jiksbu t-tliet punti iżda fil-football kollox jista’ jseħħ meta is- sorpriżi ma jonqsux.
Napoli v Sassuolo – Iċ- champions Napoli jibdew favoriti netti li jiksbu t-tliet punti meta jilqgħu lil Sassuolo, fi Stadio Diego Armando Maradona.
Il-Partenopei kellhom bidu brillanti għall-istaġun meta b’wirja eċċezzjonali, barra minn darhom, huma għelbu lil Frosinone bl-iskor ta’ 3-1 biex komplew jikkonfermaw il-qawwa tal- attakk tagħhom.
Sassuolo sofrew telfa ta’ 2-0 kontra Atalanta fejn l-attakk tagħhom deher ineżistenti filwaqt li d-difiża kkommettiet bosta żbalji.
F’dan il-konfront, huma jridu joqogħdu attenti li ma jirrepetux l-istess żbalji minħabba li n-Naplitanti għandhom elementi tajbin biżżejjed biex jikkastigaw ma l-iċken spazju li jsibu.
Napoli għandhom nieqes lil Kvicha Kvaratshkelia li mistenni jidħol f’Settembru minħabba uġigħ muskolari.
Min-naħa ta’ Sassuolo, dawn ma jistgħux jinkludu lis-sospiż Ruan u lill-imweġġa’ Agustin Alvarez
Milan v Torino – Milan jibdew bħala favoriti li jakkwistaw it-tieni rebħa staġjonali meta jilqgħu lil Torino fi Stadio Giuseppe Meazza.
Ir-Rossoneri bdew l-istaġun bl-aqwa mod possibbli wara li rebħu 2-0 barra minn darhom għand Bologna.
Christian Pulisic spikka fost kulħadd u minbarra li skorja t-tieni goal huwa bena l-kostruzzjoni tat-team hekk kif jidher li se jkun akkwist ferm importanti.
Min-naħa tagħhom, Torino setgħu jispiċċaw biss fi draw ta’ 0-0 kontra Cagliari f’logħba li huma naqsu milli jiskorjaw.
Żgur li l-coach, Ivan Juric, irid jara aktar ideat fl-attakk f’logħba li kellhom jirbħu iżda kellhom jikkuntentaw b’punt wieħed biss.
Milan se jkollhom jgħaddu mingħajr Ismael Bennacer filwaqt li Torino ma jistgħux jinkludu lil Koffee Djidji minħabba li qed jirkupra minn injury.
Juventus v Bologna – Juventus jimmiraw li jirreġistraw it-tieni rebħa minn daqstant logħbiet meta jiffaċċjaw lil Bologna fl-Allianz Stadium.
It-team immexxi mill-coach, Massimiliano Allegri, kiseb rebħa tajba ta’ 3-0 għand Udinese sabiex bdew l-istaġun fuq nota mill-aktar pożittiva.
Fuq kollox, il-partitarji Juventini sa fl-aħħar raw dik il-grinta tipika tat-team fejn Andrea Cambiaso u Timothy Weah spikkaw fuq kulħadd.
Bologna kellhom iċedu għall-qawwa ta’ AC Milan meta tilfu f’darhom bl-iskor ta’ 2-0.
Huma jinsabu konxji li din mhux se tkun partita faċli u mistennija jinżlu b’tattika difensiva u joperaw bil-kontrattakki biex iżommu l-pressjoni offensiva tal-Juventini.
Il-Bianconeri għadhom mingħajr Moise Kean u Mattia de Sciglio, b’Musa Barrow u Adama Souamoro ikunu neqsin għal Bologna, minħabba li jinsabu mweġġgħin.
Cagliari v Inter – Barra minn darhom Inter għandhom konfront delikat kontra Cagliari.
It-team immexxi mill-coach, Simone Inzaghi, ġej minn rebħa prezzjuża ta’ 2-0 kontra Monza f’logħba li huma kkontrollaw mingħajr problemi … iżda naqsu li jsarrfu d-dominanza tagħhom f’aktar goals.
Min-naħa ta’ Cagliari, dawn ġejjin minn draw ta’ 0-0 kontra Torino biex il-punt miksub jista’ jiswa mitqlu deheb hekk kif fl-istaġun li għadda salvaw mir-relegazzjoni proprju fl-aħħar ġurnata.
Din se tkun logħba speċjali għall-coach ta’ Cagliari, Claudio Ranieri, li se jkun qed jaffronta lill-eks team tiegħu li kien imexxi fl-istaġun 2011/12.
It-team minn Sardinja se jkollu jgħaddi mingħajr is-servizzi ta’ Gianluca Lapadula, Marco Mancuso u Marko Rog minħabba li jinsabu mweġġgħin.
Inter m’għandhom l-ebda problema ta’ formazzjoni u għaldaqstant Inzaghi jista’ jutilizza l-aqwa elementi possibbli.
