Illum jirritorna l-kampjonat Taljan wara l-waqfa internazzjonali bl-aktar partita attraenti tkun dik li tintlagħab fi Stadio San Siro bejn Inter u Milan, fid-Derby della Madonnina.
It-team immexxi mill-coach, Christian Chivu, jinżel għal din il-partita f’forma brillanti hekk kif jinsab fil-quċċata tal-klassifika flimkien ma’ Roma, b’differenza ta’ goals aħjar, wara tliet rebħiet konsekuttivi.
Żewġ punti warajhom hemm ir-rivali tal-istess belt li fl-aħħar ħames partiti ġew miżmuma tliet darbiet u għaldaqstant fallew sitt punti fit-tentattiv li jkomplu jisfidaw għar-rebħ tat-titlu.
Fil-kampjonat dawn iż-żewġ timijiet lagħbu 182 partita bejniethom fejn Inter rebħu 70, Milan rebħu 55 filwaqt li s-57 logħbiet l-oħra spiċċaw fi draw.
In-Nerazzurri skorjaw 260 kontra l-234 tar-Rossoneri.
Inter ma jistgħux jutilizzaw lill-imweġġa’ Henrikh Mkhitaryan filwaqt li Denzel Dumfries huwa dubjuż.
Għal Milan, Christian Pulisic u Adrien Rabiot huma dubjużi iżda Mike Maignan, Matteo Gabbia u Samuele Ricci, irkupraw għal kollox u se jkunu għad-dispożizzjoni.
Napoli v Atalanta – Napoli jilqgħu lil Atalanta fejn jibdew favoriti li jiksbu t-tliet punti.
Filwaqt li huma jinsabu fit-tieni post flimkien ma’ Milan, Atalanta niżlu fit-13-il post tal-klassifika wara sensiela ta’ rizultati negattivi u huma biss id-dell tal-forma tal-istaġun li għadda meta spiċċaw fit-tielet post tal-klassifika.
Napoli se jkollhom jgħaddu mingħajr Kevin De Bruyne, Romelu Lukaku u Frank Anguissa minħabba injury, filwaqt li l-Bergamaschi mistennija jkollhom l-iskwadra kollha għad-dispożizzjoni.
Cremonese v Roma – Anke Roma jibdew favoriti netti li joħorġu bil-punti massimi minn dan il-konfront.
Ta’ nota huwa l-fatt li d-difiża tal-Giallorossi qed tispikka hekk kif s’issa sofriet ħames goals biss.
Roma u Cremonese skorjaw numru identiku ta’ goals iżda jinsabu f’naħat opposti tal-klassifika.
Il-Giallorossi se jkollhom lil Paulo Dybala, Leon Bailey u Edoardo Bove neqsin minħabba injury.
Juventus v Fiorentina – Juventus jimmiraw li jestendu s-sensiela tagħhom mingħajr telfa għal erba’ logħbiet … kontra Fiorentina li jinsabu fl-aħħar post fejn għadhom qed ifittxu l-ewwel rebħa.
Peró, rebħa hija mperattiva għall-Bianconeri biex jibqgħu jżommu l-pass mat-timijiet ta’ fuq.
Huma se jkollhom lil Dusan Vlahovic u Daniele Rugani neqsin minħabba li qed jirkupraw minn injury.