Meta jirritorna l-kamponat Taljan wara l-waqfa internazzjonali fejn l-Italja sfaw eliminati mit- Tazza tad-Dinja għat-tieni darba konsekuttiva, bla dubju, l-aktar logħba li tiġbed attenzjoni hija dik bejn ir-rivali eterni Juventus u Inter liema konfront huwa meqjus bħala d-derby tal-Italja.
Min-naħa l-oħra, filwaqt li jkunu qed jittamaw għal żelqa minn Inter, il-leaders Milan jilqgħu lil Bologna filwaqt li Napoli, li jinsabu fit-tieni pożizzjoni, għandhom partita mill-aktar diffiċli meta jmorru jilagħbu għand Atalanta.
Juventus v Inter – Dan huwa dwell klassifiku bejn żewġ timijiet fejn fl-aħħar snin ir-rivalitá ta’ bejniethom tant kibret li din il-partita titqies bħala d-derby tal-Italja.
Din hija logħba li l-ebda team ma jrid jitlef biex jibqa’ fit-taqtiegħa għar- rebħ tat-titlu għalkemm fil- veritá iċ-ċansijiet tal-Bianconeri huma kemmxejn limitati.
Filwaqt li f’dawn l-aħħar seba’ partiti n-Nerazzurri rebħu waħda biss, fejn b’kollox rebħu seba’ punti u fallew 14, Juventus bdew ġejjin f’tagħhom wara bidu mill-aktar negattiv. Infatti fl-aħħar seba’ logħbiet huma kisbu ħames rebħiet u ġew miżmuma darbtejn.
Iżda filwaqt li Inter għandhom il-players kollha disponibbli, il-coach tal-Bianconeri, Massimiliano Allegri, se jkollu jgħaddi mingħajr l-imweġġgħin Kaio Jorge u Westin McKennie u s-sospiż Luca Pellegrini.
Milan v Bologna – Milan jospitaw lil Bologna fejn jibdew favoriti li jieħdu t-tliet punti biex jibqgħu jgawdu l-vantaġġ f’ras il-klassifika, hekk kif jinsabu tliet punti fuq Napoli u sitta fuq Inter li jridu jirkupraw partita.
Il-coach, Stefano Pioli, jitama li t-team tiegħu jżomm il-konsistenza fit-tentattiv jirbħu t-titlu wara nuqqas ta’ 10 snin.
Min-naħa tagħhom, Bologna se jkunu mingħajr il-coach, Sinisa Mihajlovic, li reġgħet tfaċċatlu il-marda tal-lewkemija.
Barra minn hekk huma se jkunu mingħajr l-imweġġgħin Lorenzo de Silvestri, Ibrahim Mbaye u Nicolas Dominguez.
Atalanta v Napoli – Atalanta jilqgħu lil Napoli fejn għandhom bżonn il-punti biex jibqgħu jittamaw għal post fil-UEFA Champions League.
It-team immexxi minn Giampiero Gasperini kellu wirjiet imħallta matul dan l-istaġun fejn xejn ma kien konsistenti fil-logħob tiegħu.
Huma se jkollhom neqsin lil Rafael Toloi, Josip Ilicic u Duvan Zapata li qed jirkupraw minn injury.
Għall-istess raġuni, il- Partenopei għandhom neqsin lil Andrea Petagna, Alex Meret u Giovanni Di Lorenzo filwaqt li Victor Osimhen u Adil Rrahmani huma sospiżi.
Sampdoria v Roma – Roma jmorru għand Sampdoria fejn jimmiraw li joħorġu bit-tliet punti hekk kif għadhom biċ-ċans li jikkwalifikaw għall-UEFA Europa League. Min-naħa ta’ Sampdoria, dawn iridu jkomplu jitbiegħdu mill- periklu tar-relegazzjoni.
