It-tielet ġurnata tas-Serie A għandha tkun mill-aktar interessanti hekk kif se ġġib magħha konfront klassifiku jew aħjar id-’Derby tal-Italja’ bejn ir-rivali eterni, Juventus u Inter.
Min-naħa taċ-champions, Napoli, għandhom partita kemmxejn delikata meta jmorru jilagħbu għand Fiorentina filwaqt li Milan jospitaw lil Bologna hekk kif fuq il-karta jibdew bħala l-favoriti li jiksbu t-tliet punti.
Juventus v Inter – L-attenzjoni prinċipali se tkun mixħuta fuq l-Allianz Stadium fejn tkompli tiġġedded ir-rivalitá bejn dawn iż-żewġ timijiet glorjużi.
Taħt it-tmexxija tal-coach, Igor Tudor, il-Bianconeri bdew l-istaġun bl-aqwa mod possibbli meta għandhom punti massimi minn żewġ ħarġiet meta għelbu lil Genoa (1-0) u lil Parma (2-0).
Għalihom qed jerġa’ jimpressjona l-attakkant internazzjonali Serb, Dusan Vlahovic, li minbarra li kien fost l-aqwa players, sab ix-xibka darbtejn.
Iżda bl-istess ammont ta’ goals hemm ukoll l-attakkant interanazzjonali Franċiż ta’ Inter, Marcus Thuram.
Peró, in-Nerazzurri ma tantx kellhom bidu kif mixtieq minħabba li wara li għelbu lil Torino f’darhom bl-iskor ta’ 5-0, huma sfaw megħluba minn Udinese bl-iskor ta’ 2-1.
Rebħa għal Juventus tkun tfisser li jiftħu vantaġġ ta’ sitt punti u għaldaqstant xejn għajr minn rebħa ma tissodisfa l-kriterji ta’ Inter.
Din hija partita li tista’ tmur kull naħa.
Napoli v Fiorentina – Napoli għandhom impenn barra minn darhom, fi Stadio Artemio Franchi, kontra Fiorentina.
It-team immexxi mill-coach, Antonio Conte, rebaħ iż-żewġ logħbiet għad-dispożizzjoni tiegħu meta għeleb lil Sassuolo (2-0) u lil Cagliari (1-0).
U minkejja li l-Partenopei ma jistgħux jagħmlu użu mill-imweġġa’ Romelu Lukaku, Scott McTominay u Kevin De Bruyne qed jifformaw koppja formidabbli fl-attakk.
Min-naħa tagħhom, Fiorentina għadhom qed ifittxu l-ewwel rebħa wara żewġ draws konsekuttivi kontra Cagliari (1-1) u Torino (0-0).
Il-Viola ma jistgħu jinkludu lil Nicolas Valentini, Antonin Barak u Christian Kouame, minħabba li qed jirkupraw minn injury.
Milan v Bologna– Wara telfa mhux mistennija ta’ 2-1 kontra Cremonese u rebħa ta’ 2-0 fuq Lecce, Milan jilqgħu lil Bologna f’liema partita jridu jirbħu akkost ta’ kollox minħabba li ma jistgħux jaqgħu lura fl-isfida għar-rebħ tal-Iscudetto.
Min-naħa tagħhom, Bologna ġejjin minn telfa kontra Roma (1-0) u rebħa fuq Como (1-0).
Milan ma jistgħux jinkludu lil Sergio Jimenez, Ardon Jashari, Alex Jimenez minħabba li jinsabu mweġġgħin.
