Meta jirritorna s-Serie A wara l-impenji tat-team nazzjonali fil-logħbiet ta’ kwalifikazzjoni tal-Euro 2024, tintlagħab id-disa’ ġurnata bil-konfront l-aktar li jispikka huwa dak bejn Milan u Juventus filwaqt li Inter imorru fil-belt ta’ Turin biex jaffrontaw lil Torino.
Milan v Juventus – Il- leaders Milan jilqgħu lil Juventus, f’dik li hija meqjusa bħala l-aqwa partita ta’ tmiem il-ġimgħa.
Filwaqt li l-Milanisti jimmiraw għal rebħa biex jibqgħu fil-quċċata, telfa għal Juventus tkun tfisser li jiddistakkaw lilhom infushom b’seba’ punti mill-istess Rossoneri. Iżda rebħa tpoġġihom biss punt taħthom.
Dan se jkun it-89 konfront bejn iż-żewġ timijiet f’San Siro fejn Milan rebħu 30 filwaqt li Juventus rebħu 24.
Wara Paul Pogba, din il-ġimgħa l-Bianconeri ħadu l-aħbar ħażina li Nicoló Fagioli ġie sospiż għal seba’ xhur wara li ammetta li lagħab imħatri llegali.
Huma se jkollhom neqsin ukoll lil Danilo, Federico Chiesa, Dusan Vlahovic, Alex Sandro u Mattia de Sciglio minħabba li qed jirkupraw minn injury.
Min-naħa l-oħra Milan ma jistgħux jinkludu lil Mike Maignan u Theo Hernandez li huma sospiżi filwaqt li Rade Krunic, Ruben Loftus Cheek, Mattia Caldara u Ismael Bennacer għadhom imweġġgħin.
Torino v Inter – Inter jimmiraw li jirritornaw għar- rebħ hekk kif ġejjin minn draw ta’ 2-2 kontra Bologna wara li fetħu vantaġġ ta’ żewġ goals biex fallew żewġ punti mill-aktar importanti bil-konsegewenza li ċedew l-ewwel post lir-rivali tal-istess belt, Milan.
Min-naħa l-oħra, il-Granata għandhom bżonn il- punti biex ma jinqabdux fit-taqtiegħa għas-salvazzjoni.
Inter se jkollhom jgħaddu mingħajr is-servizzi tal- imweġġa’ Marko Arnautovic filwaqt li Torino ma jistgħux jinkludu lil Brandon Soppy, Alex Buongiorno u Koffi Djidji.
Verona v Napoli – Napoli jittamaw li jiksbu l-ħames rebħa staġjonali meta jmorru fir-reġjun tal-Veneto biex jaffrontaw lil Verona.
It-team immexxi mill-coach, Rudi Garcia, ġej minn telfa f’daru xejn mistennija ta’ 3-1 kontra Fiorentina biex kibret il-pressjoni li jista’ jitkeċċa hekk kif bosta mill-players ma jriduhx fit-tmexxija.
Min-naħa ta’ Verona, dawn jinsabu fin-naħa t’isfel tal-klassifika bi tmien punti minn daqstant logħbiet.
Huma ġejjin minn telfa diżappuntanti kontra Frosinone u se jippruvaw jieħdu vantaġġ li se jilagħbu f’darhom u eventwalment joħolqu xi tip ta’ sorpriża.
Verona għandhom nieqsa lil Isak Hien, Pawel Dawidowich, Juan Cabal, Josh Doig u Jayden Braaf filwaqt li Napoli ma jistgħux jużaw lil Victor Osimhen, Andre Anguissa, Juan Jesus, Amir Rrahmani u Pierluigi Gollini … minħabba li huma kollha mweġġgħin.
