Serie A: Milan imorru għand Juventus fl-aqwa partita

Matul dawn it-tliet ġra­net tintlagħab jintlagħab is-sitt programm tas-Serie bl-aktar logħba attraenti tkun dik bejn Juventus u Milan b’dawn tal-aħħar qed jaqsmu l-ewwel post ma’ Napoli u Roma.

Juventus v Milan – Juventus għandhom impenn ferm diffiċli kontra Milan fl-Al­lianz Stadium.

Ir-Rossoneri għaddejjin minn mument maġiku hekk kif ġejjin minn rebħa ta’ 2-1 fuq Napoli biex laħquhom fil-quċċata tal-klassifika.

Min-naħa tagħhom, Juventus għadhom bla telfa iżda fl-aħħar żewġ ħar­ġiet fallew erba’ punti meta ġew miżmuma minn Verona u minn Atalanta bl-iskor identiku ta’ 1-1.

Il-Milanisti se jkollhom jgħaddu mingħajr is-servizzi tas-sospiżi Pervis Estupinan u Santiago Gimenez filwaqt li Fikayo Tomori u Ardon Jashari huma mweġ­ġgħin.

Juventus iridu jaraw il-kundizzjoni fiżika ta’ Chico Conceicao, Gleison Bremer, Khephren Thu­ram-Ulien, Arkadiusz Milik u Fabio Miretti.

Napoli v Genoa – Iċ- champions Napoli jimmiraw li jirritornaw għar- rebħ hekk kif jaffrontaw lil Genoa, fi Stadio Diego Armando Maradona.

It-team immexxi mill-coach, Antonio Conte, irid jagħraf kif se jirriorganizza u jirkupra mit-telfa kontra Milan.

Peró, huma jinżlu għal dan il-konfront b’moral għoli hekk kif nhar l-Erbgħa li għadda, il-Partenopei rreġistraw rebħa ta’ 2-1 fuq Sporting, fil-Fażi tal-Kampjonat tal-UEFA Champions League.

Napoli għandhom bosta players neq­sin li jinkludu lil Mathias Olivera, Leonardo Spinazzola, Amir Rrahmani, Alessandro Buongiorno, Jesper Lindstroem, Nikita Contini u Romelu Lukaku, għax jinsabu mweġġgħin.

Min-naħa tagħhom, Ge­noa ma jistgħux jinkludu lil Junior Messias għall-istess raġuni.

Inter v Cremonse – Din hija partita delikata għal Inter hekk kif jilqgħu lil Cremonese li jinsabu bl-istess ammont ta’ punti.

Dan minbarra li Cremonese għadhom ma ġewx megħluba s’issa.

In-Nerazzurri bħal don­n­hom ġejjin f’tagħhom wara li sofrew żewġ telfiet fil-kampjonat.

Huma saħansitra għelbu lil Sparta Prague bl-iskor ta’ 3-0, fil-Fażi tal-Kampjo­nat tal-UEFA Champions Lea­gue fejn Lautaro Martinez kien il-protagonista permezz ta’ doppjetta.

Min-naħa tagħhom, Cremonese jimmiraw għat-tie­ni rebħa kontra team minn Milan wara li, fit-23 ta’ Awwissu, kienu għelbu lil AC Milan bl-iskor ta’ 2-1.

Inter għandhom il-players kollha għad-dispożiz­zjoni tagħhom filwaqt li Cremonese ma jistgħux jinkludu lil Michele Collocolo li jinsab imweġġa’. Mattia Valoti u Federico Baschirotto jinsabu dubjużi.