Meta llum tkompli tintlagħab it-23 ġurnata tas-Serie A, Napoli biss se jkunu qed jilagħbu f’darhom mit-timijiet ta’ fuq.
Inter, Milan u Roma se jkollhom partiti delikati li jistgħu jagħtu ċ-ċans lil Napoli biex japprofittaw ħalli jnaqqsu d-distakk min- Nerazzurri li qed jillidjaw il-klassifika.
Cremonese v Inter – Inter jivvjaġġaw lejn il-Lombardia biex jaffrontaw lil Cremonese.
Minkejja li huma jibdew favoriti, Cremonese jinżlu għal dan il-konfront motivati konxji mill-fatt li għandhom bżonn il-punti biex jitbegħdu aktar miż-żona tar-relegazzjoni u għaldaqstant mistennija joffru sfida denja lill-Interisti li peró ġejjin minn disa’ rebħiet mill-aħħar 10 ħarġiet.
Napoli v Fiorentina – Napoli jimmiraw li jirritornaw għar-rebħ meta jilqgħu lil Fiorentina li jinsabu t-tielet mill-aħħar u għalhekk jinsabu fiż-żona l-ħamra.
Il-Partenopei jimmiraw li jirritornaw għar-rebħ wara t-telfa diżappuntanti ta’ 3-0 għand Juventus fi tmiem il-ġimgħa li għadda.
Barra minn hekk, it-team immexxi mill-coach, Antonio Conte, irid jinsa l-eliminazzjoni mill-UEFA Champions League u jiffoka fuq il-kampjonat domestiku minħabba li jistgħu jfallu milli jtemmu mal-ewwel erbgħa.
Bħalissa mhumiex għaddejjin minn forma tajba minħabba li minn massimu ta’ 15-il punt, huma kisbu biss sitt punti … rebħa u tliet draws.
Min-naħa tal-Viola, hija prioritá għalilhom li joħorġu rebbieħa fit-tentattiv li jkomplu bil-pjani tagħhom għas-salvazzjoni.
Udinese v Roma – Il-pressjoni tinsab kollha fuq Roma hekk kif imorru jilagħbu għand Udinese li jinsabu xxamplati f’nofs il- klassifika u ‘l bogħod minn kull periklu tar-relegazzjoni.
Iżda Roma jinżlu għal dan il-konfront motivati konxji mill-fatt li jinsabu għaddejjin minn sensiela pożittiva hekk kif fl-aħħar erba’ ħarġiet huma rreġistraw 10 punti.
Bologna v Milan – Milan għandhom partitia diffiċli meta jmorru jilagħbu għand Bologna li jinsabu fit-tmien post tal-klassifika u b’ċans tajjeb li jikkwalifika għall-UEFA Conference League.
Ta’ min jinnota li Milan ilhom ma jitilfu sa mill-ewwel ġurnata tal-istaġun meta dak in-nhar sfaw megħluba f’darhom minn Cremonese bl-iskor ta’ 2-1.
Peró, huma jinsabu ħames punti taħt il-leaders Inter u għaldaqstant xejn għajr minn rebħa ma tissodisfa l-kriterji tagħhom jekk iridu jibqgħu jżommu l-kuntatt mar-rivali eterni tal-istess belt … għax fl-istess waqt jistgħu inaqqsu l-vantaġġ ma’ ta’ warajhom.