Meta tintlagħab il-ħames ġurnata tas-Serie A, l-attenzjoni prinċipali se tkun mixħuta fuq San Siro hekk kif Milan jospitaw lil-leaders Napoli li għandhom punti massimi.
Bla dubju, dan huwa programm mill-aktar interessanti hekk kif se jippreżenta wkoll logħbiet li jispikkaw bħal Juventus v Atalanta u Cagliari v Inter.
Milan v Napoli – Dan huwa konfront klassiku bejn Milan u Napoli fejn iqanqlu ż-żminijiet sbieħ tat-tmeninijiet u d-disgħinijiet bi players bħal Ruud Gullit u Marco van Basten għar-Rossoneri kif ukoll Diego Armando Maradona u Careca għall-Partenopei.
Intant, filwaqt li n-Naplitani rebħu l-partiti kollha s’issa, il-Milanisti ġew megħluba f’okkażjoni waħda, f’darhom kontra Cremonese bl-iskor ta’ 2-1 u għaldaqstant jinsabu distakkati bi tliet punti.
F’din il-partita għandu jkun hemm dwell interessanti bejn Luka Modric u Christian Pulisic (Milan) u Scott McTominay u Kevin De Bruyne (Napoli).
Milan se jkollhom jgħaddu mingħajr is-sospiż Santiago Gimenez u l-imweġġgħin, Ardon Jashari, Mike Maignan, Rafael Leao u Tommaso Pobeg.
Napoli ma jistgħux jinkludu lil Nikita Contini u Romelu Lukaku minħabba li qed jirkupraw minn injury.
Juventus v Atalanta – Juventus għandhom impenn pjuttost diffiċli meta jilqgħu lil Atalanta.
Il-Bianconeri jimmiraw li jirritornaw għar-rebħ hekk kif fl-aħħar ħarġa tagħhom ġew miżmuma fi draw ta’ 1-1 minn Verona biex fallew żewġ punti u tilfu l-pass ma’ Napoli fil-quċċata tal-klassifika.
Min-naħa tagħhom, Atalanta ġejjin minn rebħa ta’ 3-0 għand Torino u għalhekk jinżlu għal dan il- konfront b’moral għoli.
Iżda huma għandhom bosta players imweġġgħin, fosthom Isak Hien, Nicola Zalewski, Charles De Ketelaere, Giorgio Scalvini, Ibrahim Sulemana, Gianluca Scamacca, Ederson, Mitchel Bakker u Sead Kolasinac.
Cagliari v Inter – Inter li jinsabu fl-10 post tal-klassifika jmorru jilagħbu f’Sardinja għand Cagliari f’dik li hija meqjusa bħala partita mill-aktar diffiċli.
In-Nerazzurri ġew megħluba darbtejn minn erba’ logħbiet biex tilfu l-kuntatt ma ta’ fuq u għaldaqstant ma jistgħux jaffordjaw li joħorġu minn dan il-konfront b’idejhom vojta.
Iżda huma jridu jissuperaw ‘ostaklu’ li jinsab fis-seba’ post tal-klassifika u għalhekk iridu jkunu bl-aqwa forma possibbli.
Mil-lat pożittiv, il-coach Cristian Chivu, se jinżel bl-aqwa forma possibbli minħabba li l-players kollha jinsabu għad-dispożizzjoni tiegħu.