Matul dawn l-erba’ ġranet jintlagħab l-24 programm tal-Kampjonat Taljan, bil-leaders Napoli jkunu nvoluti f’partita delikata meta jmorru jilagħbu għand Empoli bil-għan li jkomplu għaddejjin bis- sensiela pożittiva.
Inter, li jinsabu fit-tieni post, barra minn darhom jaffrontaw lil Bologna fejn mistennija joħorġu bit-tliet punti.
Partita ferm interessanti hija bejn Milan u Atalanta li t-tnejn qed jissieltu għal post fil-UEFA Champions League.
Empoli v Napoli – Napoli jmorru għand Empoli mingħajr l-ebda pressjoni hekk kif qed igawdu vantaġġ ta’ 15-il punt f’ras il-klassifika.
Huwa jinżlu b’moral mill-aktar għoli meta ġejjin minn rebħa ta’ 2-0 għand Eintracht Frankfurt biex għandhom sieq waħda fil-kwarti-finali tal-UEFA Champions League.
Jidher li bħalissa dak kollu l-Partenopei jmissu jsirilhom deheb. Huwa jimmiraw li jiksbu d-19-il rebħa fl-aħħar 20 logħba.
Huma mistennija li jutilizzaw l-istess formazzjoni li biha għelbu lil Eintracht.
Bologna v Inter – Inter jibdew favoriti li joħorġu bit-tliet punti meta jmorru jilagħbu għand Bologna li jinsabu xxamplati fit-tmien post.
Fir-realtá, hija ferm diffiċli li Inter jilħqu lil Napoli u għaldaqstant huma għandhom jikkonċentraw li jtemmu fit-tieni post tal-klassifika.
Dan minbarra li huma għandhom iċ-ċans li jikkwalifikaw għall-kwarti-finali taċ-Champions League.
Bologna ma jistgħux jinkludu lil Adama Souaro, Joshua Zirzkee, Nicola Sansone u Kevin Bonifazi filwaqt li Inter għandhom barra lil Joaquin Correa.
Milan v Atalanta – Milan jospitaw lil Atalanta f’dik li hija meqjusa partita mill-aktar diffiċli.
Filwaqt li r-Rossoneri ġejjin minn rebħa ta’ 1-0 għand Monza, Atalanta sfaw megħluba f’darhom kontra Lecce bl-iskor ta’ 2-1 u għaldaqstant xejn għajr minn rebħa ma tissodisfa l-kriterji tagħhom jekk iridu jżommu l-kuntatt maż-żona Ewropea.
Milan se jkollhom jgħaddu mingħajr l-imweġġgħin Davide Calabria, Ismael Bennacer u Mike Maignan filwaqt li Atalanta għandhom lil Duvan Zapata, Hans Hateboer u Mario Pasalic neqsin għall-istess raġuni.
Juventus v Torino – Juventus u Torino jilagħbu fid-”Derby delle Mole” hekk kif il-Bianconeri jinsabu fuq wieħed biss fuq il-Granata, fis-seba’ u fid-disa’ post rispettivament.
Hemm dan id-distakk ta’ punt wara li Juventus ġew imnaqqsa 15-il punti wara li nstabu ħatja ta’ rregolaritajiet fir-rigward tal-kotba finanzjarji tagħhom.
B’hekk, iċ-ċansijiet li jikkwalifikaw għall-UEFA Champions League huma remoti ħafna.
Huma għandhom bosta players neqsin fosthom Paul Pogba, Federico Chiesa, Fabio Miretti, Arkadiusz Milik u Kaio Jorge
