Meta tintlagħab ir-raba’ ġurnata tas-Serie A, iż-żewġ timijiet li qed jaqsmu l-quċċata tal-klassifika, Napoli u Juventus, m’għandhomx ifallu hekk kif filwaqt li l-Partenopei jospitaw lil Pisa, il-Bianconeri jmorru jilagħbu għand Verona
Napoli v Pisa – Iċ-champions Taljani, Napoli, ikunu fl-azzjoni nhar it- Tnejn li ġej wara li nhar il-Ħamis sfaw megħluba bl-iskor ta’ 2-0, fl-Etihad, kontra Manchester City fil-Fażi tal-Kampjonat tal-UEFA Champions League.
Huma jilqgħu lil Pisa li jinsabu fil-qiegħ tal-klassifika flimkien ma’ Parma u Lecce b’punt wieħed biss.
Napoli ġejjin minn rebħa ta’ 3-1 għand Fiorentina u jimmiraw li jkomplu b’din il-kontinwitá ta’ rebħ.
Huma ma jistgħux jinkludu lill-imweġġgħin Amri Rrahmani u Romelu Lukaku.
Verona v Juventus – Bħal Napoli, Juventus għandhom rekord massimu ta’ punti minn tliet partiti u għaldaqstant jinżlu b’moral għoli.
Ir-rebħa ta’ 4-3 kontra r-rivali Inter, imliethom bi stimolu psikoloġiku u għaldaqstant jinżlu għal dan il-konfront b’mentalitá rebbieħa.
Anke jekk fost il-ġimgħa huma sfaw miżmuma minn Borussia Dortmund f’darhom bl-iskor ta’ 4-4 fiċ-Champions League, dan ir-riżultat m’għandux ifixkel lill-Bianconeri milli jagħmlu l-kompitu tagħhom b’suċċess għand Verona.
Il-coach, Igor Tudor, se jkollu jgħaddi mingħajr is-sospiż Andrea Cambiaso u l-imweġġgħin Fabio Miretti u Chico Conceicao.
Inter v Sassuolo – Inter iridu jinsew id-diżappunt tat-telfa ta’ 4-3 kontra Juventus meta jilqgħu lil Sassuolo. Minn tliet partiti huma sfaw megħluba darbtejn bit-telfa l-oħra tkun dik ta’ 2-1 kontra Udinese.
Għaldaqstant huma jinsabu taħt pressjoni biex jiksbu t-tliet punti … u akkost ta’ kollox ma jistgħux iwaqqgħu l-punti.
Ir-rebħa ta’ 2-0 kontra Ajax, fiċ-Champions League, għandha tkun l- injezzjoni f’waqtha biex in-Nerazzurri jirritornaw għall-forma solita tagħhom.
Udinese v Milan – Milan imorru fir-reġjun ta’ Friuli biex jilagħbu kontra Udinese f’dik li hija meqjusa bħala waħda diffiċli.
Ir-Rossoneri ġejjin minn rebħa minima ta’ 1-0 fuq Bologna u jridu jkomplu jibnu fuqha hekk kif huma diġá sofrew telfa, dik ta’ 2-1 kontra Cremonese.
Huma se jilagħbu kontra team li minn tliet partiti kiseb żewġ rebħiet u draw biex qed jaqsam it-tieni post flimkien ma’ Cremonese.
Milan għandhom barra lis-sospiż Santiago Gimenez u lill-imweġġgħin Mike Maignan u Rafael Leao.
