L-aqwa partita tat-28 ġurnata tas-Serie A hija dik bejn iż-żewġ timijiet li qed jokkupaw il-quċċata tal- klassifika fejn Napoli jospitaw lil Milan.
Min-naħa ta’ Inter li jinsabu fit-tieni post b’żewġ punti inqas iżda jridu jirkupraw partita kienu fl-azzjoni tard il-bieraħ fil-għaxija fejn jittamaw ukoll li dan il-konfront jintemm fi draw.
Napoli v Milan – Dan huwa konfront diffiċli bejn Napoli u Milan minkejja li l-Partenopei jibdew ftit aktar favoriti minħabba li għandhom il-vantaġġ li se jilagħbu f’darhom.
Rebħa għal xi ħadd minnhom tkun tfisser pass kbir biex ikomplu jisfidaw għar- rebħ tat-titlu. Iżda telfa tkun skoss qawwi għall-objettivi tagħhom hekk kif Inter huma sfidanti denji u għaldaqstant l-iżvantaġġ mhux se jiġi rkuprat malajr.
Barra minn hekk, riżultat ta’ draw ma jikkuntenta lil ħadd ħlief lin-Nerazzurri.
Napoli għandhom bosta players li qed jirkupraw minn injury fosthom Kevin Malcuilt, Andre Zambo Anguissa, Axel Tuanzebe u Hirving Lozano.
Min-naħa tagħhom, Milan ma jistgħux jinkludu lill-attakkant veteran Zlatan Ibrahimovic iżda mistenni jidħol il-ġimgħa d-dieħla, b’ Alessio Romagnoli li wkoll huwa dubjuż.
Juventus v Spezia – Fuq il-karta Juventus jibdew favoriti meta f’darhom jilagħbu kontra Spezia li jinsabu fis-16-il post, jew aħjar, erba’ punti fuq iż-żona tar-relegazzjoni.
Wara bidu kemmxejn negattiv, Juventus bħal donnhom qabdu r-ritmu f’dawn l-aħħar ġimgħat u kisbu punti ferm importanti li ressquhom biss seba’ punti bogħod mill-quċċata.
L-aħħar akkwist tagħhom f’Jannar li għadda, is-Serb Dusan Vlahovic, jinsab fil-quċċata tal-lista tal-iskorers meta sab ix-xibka 20 darba għalkemm ħafna mill-goals skorjahom meta kien jilgħab ma’ Fiorentina.
Peró huwa se jkun pedina mill-aktar importanti li fl-assenza tal-imweġġa’ Federico Chiesa, infilsa lilu nnifsu tant tajjeb fl-iskwadra u fil-pjani tal-coach.
Peró l-Bianconeri għandhom bosta players neqsin fosthom, Denis Zakaria, Alex Sandro, Westin McKennie, Paulo Dybala u Giorgio Chiellini.
Min-naħa ta’ Spezia, dawn għandhom liż-żewġ players, Kelvin Adou u Jakub Kiwior, sospiżi.
Roma v Atalanta – Dan huwa konfront mill-aktar importanti għaż-żewġ timijiet fejn xejn għajr minn rebħa ma tissodisfa l-kriterji tagħhom biex jibqgħu jisfidaw għal post fiċ-Champions League.
Il-coach ta’ Atalanta, Giampiero Gasperini, għandu lil Rafael Toloi sospiż filwaqt li Ruslan Malinovski, Josep Ilicic u Duvan Zapata qed jirkupraw minn injury.
Min-naħa ta’ Roma, Felix Afena Gyan, Sergio Olivera u Leonardo Spinazzola, ukoll se jkun neqsin għax jinsabu mweġġgħin.
