Serie A: Partiti ferm delikati għal Napoli u Inter

Meta llum u għada tintlagħab is-37 ġurnata jew aħjar dik ta’ qabel l-aħħar tas-Serie A, l-atten­zjoni tkun fuq il-leaders Napoli u Inter li jinsabu punt taħthom hekk kif għandhom partiti ferm delikati f’dan il-mument tant kruċjali. Huma se jaffrontaw lil Parma u lil Lazio rispettivament. 

Minkejja li ċ-ċansijiet huma remoti, teżisti possibbiltá li Napoli jsiru cham­pions jekk huma jegħlbu lil Parma filwaqt li Inter jitilfu kontra Lazio.

Ta’ nota huwa l-fatt li llum se tintlagħab partita waħda biss – dik bejn Genoa u Atalanta – filwaqt li l-kumplament tal-partiti se jintlagħbu għada fid-8.45 pm.

Inter v Lazio – Inter iridu jkunu fl-aqwa forma possibbli biex jegħlbu lil Lazio.

Il-pressjoni tinsab kollha fuqhom minħabba li li xejn għajr minn reb­ħa ma tissodisfa l-kriterji tagħhom. 

It-team immexxi mill-coach, Simone Inzaghi, irid joqgħod attent mill-injuries konxju mill-fatt li fil-31 ta’ dan ix-xahar huma se jilagħbu l-finali tal-UEFA Cham­pions League, kontra Paris St-Germain, fl-Allianza Are­na ta’ Munich.

Iżda fl-istess waqt, huma jridu jkomplu japprofittaw miż-żelqa ta’ tmiem il-ġimgħa li għadda ta’ Napoli meta f’darhom ġew miżmuma fi draw ta’ 2-2 biex Inter naqqsu d-distakk għal punt wieħed biss.  

Min-naħa ta’ Lazio, reb­ħa hija imperattiva biex ikomplu jisfidaw għal post fil-UEFA Champions Lea­gue fejn jittamaw ukoll li Juventus u Roma jfallu meta hemm post wieħed biss vakanti bejn dawn it- tliet timijiet.

Parma v Napoli – Wara d-draw ta’ 2-2 kontra Genoa, din id-darba Napoli ma jistgħux ifallu meta jmorru għand Parma li għandhom bżonn il-punti biex jeħilsu mir-relegazzjoni. 

It-tliet punti huma fundamentali għat-team immexxi mill-coach, Antonio Conte, hekk kif din il-partita tista’ tiddetermina fejn se jmur it-titlu. 

Minkejja li Parma jinsabu erba’ punti fuq iż-żona l-ħamra, xorta waħda huma kapaċi li jqumu għall-okkażjoni u jaħsdu lin-Naplitani. 

Wara kollox huma għelbu lil Milan (2-1), lil Bologna (2-0), lil Lazio (3-1) u lil Juventus (1-0). 

Roma v Milan – Dan huwa konfront mill-aktar interessanti bejn żewġ timijiet li ġejjin minn telfa. 

Filwaqt li Roma sfaw megħluba bl-iskor ta’ 2-1 kontra Atalanta biex ħadu skoss qawwi fit-tentattiv li jtemmu fir-raba’ post, Milan ġejjin minn diżappunt kbir meta kontra kull mistenni sfaw megħluba fil-finali tal-Coppa Italia minn Bologna bl-iskor ta’ 1-0. 

Roma jridu jirbħu bilfors filwaqt li jittamaw li Juventus u Lazio jiżolqu. Din hija sitwazzjoni għal Roma li l-kwalifikazzjoni ma tiddependix minnhom hekk kif bħalissa jinsabu punt inqas mill-istess Juventus u La­zio.

Wara li spiċċaw b’idej­hom vojta, il-mira ewlenija ta’ Milan hija li jikkwalifikaw għall-UEFA Europa Lea­gue.