Meta jirritorna l-kampjonat Taljan wara l-waqfa ta’ ġimagħtejn minħabba l-kalendarju internazzjonali, tintlagħab is- seba’ ġurnata, bl-aqwa partita tkun dik bejn Roma u Inter filwaqt li Napoli jmorru jilagħbu għand Torino.
Roma v Inter – Bla dubju, dan huwa l-aqwa konfront ta’ tmiem il-ġimgħa tas-Serie A bejn żewġ timijiet li jinsabu fin-naħa ta’ fuq tal-klassifika.
Filwaqt li Roma qed jaqsmu l-ewwel post ma’ Napoli, Inter jinsabu fir-raba’ post b’distakk ta’ tliet punti.
Immexxija mill-coach, Giampiero Gasperini, il-Giallorossi jinsabu għaddejjin minn forma formidabbli u ispirati mill-wirjiet tal-internazzjonali Arġentin, Matias Soule.
Wara żewġ telfiet staġjonali, Inter bħal donnhom reġgħu qabdu r-ritmu hekk kif il-players issa qed jidraw il-metodu tattiku tal-coach Christian Chivu.
Peró, il-fatt li se jilagħbu barra minn darhom se jkun ostaklu diffiċli u għaldaqstant xejn għajr minn rebħa ma tissodisfa l-kriterji tagħhom.
Rebħa għal Roma tkun tfisser li huma jiftħu sitt punti vantaġġ fuq l-istess Nerazzurri.
Dawn tal-aħħar għandhom lil Marcus Thuram imweġġa’ filwaqt li Roma għandhom neqsin lil Angelino, Marash Kumbulla u Edoardo Bove li wkoll qed jirkupraw minn injury.
Torino v Napoli – Iċ- champions Taljani, Napoli, jmorru għand Torino f’dik li hija meqjusa bħala partita delikata.
It-team immexxi minn Antonio Conte kiseb ħames rebħiet minn sitt logħbiet u qed jimmira li jkompli bil-kontinwitá pożittiva minħabba li jekk ifalli xi punti jista’ jinqabeż minn Roma.
Min-naħa tagħhom, Torino huma fil-bżonn tal-punti hekk kif jinsabu fis-16-il post tal-klassifika, żewġ punti fuq iż-żona l-ħamra.
Napoli ma jistgħux jinkludu lil Matteo Politano, Stanislav Lobotka, Alessandro Buongiorno, Romelu Lukaku, Amir Rrahmani, Jesper Lindstroem u Nikita Contini.
Como v Juventus – Como jospitaw lil Juventus fejn jimmiraw għar-raba’ rebħa fuq il-Bianconeri fl-istorja tas-Serie A … bl-aħħar waħda tasal fl-20 ta’ Jannar, 1952.
Jekk it-team immexxi mill-coach, Cesc Fabregas, joħroġ rebbieħ huwa jilħaq lill-istess Juventus hekk kif jinsab b’distakk ta’ tliet punti.
Min-naħa tagħhom, Juventus ma jistgħux ifallu jekk iridu jibqgħu jżommu l-pass mal-leaders.
Huma se jkollhom jgħaddu mingħajr is-servizzi ta’ Gleison Bremer, Daniele Rugani, Arkadiusz Milik, Juan Cabal u Fabio Miretti li kollha huma mweġġgħin.
Como għandhom lil Jesus Rodriguez u Edoardo Goldaniga sospiżi.