Inter ħadu skoss qawwi fit-tentattiv li jkomplu jisfidaw għar-rebħ tal-kampjonat meta f’darhom sfaw megħluba minn Roma bl-iskor ta’ 2-1 biex kienet l-ewwel rebħa għal dawn tal-aħħar mill-2017 fil-konfronti diretti.
Jose Mourinho rritorna f’San Siro, iżda kien fl-istands minħabba sospensjoni u għaldaqstant ħareġ rebbieħ kontra l-eks team tiegħu li kien ikkowċja bejn l-2008 u l-2010 fejn kien mexxa lin-Nerazzurri għar-rebħ tat-Treble.
Kienu Inter li fetħu l-iskor meta fit-30 minuta Federico Dimarco kkonkluda mill-pass ta’ Nicolo Barella.
Iżda disa’ minuti wara, il-Giallorossi kisbu d-draw meta Leonardo Spinazzola żmarka lil Paulo Dybala li mill-viċin dawwar il-ballun fis-saqaf tax-xibka.
Fis-76 minuta, Roma skorjaw il-goal tar-rebħa b’daqqa ta’ ras ta’ Chris Smalling.
